‘ഞങ്ങള്‍ മാറില്ല, ഇടി തുടരും’; ആക്ഷന്‍ ഹീറോ പോസ്റ്റുമായി കേരള പൊലീസ്; തൊലിക്കട്ടിയോ ഉളുപ്പില്ലായ്മയോ എന്ന് കമന്റുകള്‍

സംസ്ഥാനത്ത് പൊലീസ് ക്രൂരതകള്‍ക്കെതിരെ വ്യാപക പ്രതിഷേധം ഉയരുമ്പോഴും തങ്ങള്‍ നന്നാവാനുദ്ദേശിക്കുന്നില്ലെന്ന് സൂചിപ്പിക്കുന്ന പോസ്റ്റുമായി കേരള പൊലീസ്. പൊലീസ് മര്‍ദ്ദനങ്ങളെ മഹത്വവല്‍ക്കരിക്കുന്ന ആക്ഷന്‍ ഹീറോ ബിജു എന്ന സിനിമയിലെ ചിത്രമാണ് കേരള പൊലീസ് ഔദ്യോഗിക ഫേസ്ബുക്ക് പേജില്‍ പങ്കുവെച്ചിരിക്കുന്നത്. 'ആദ്യ മീം സൈലന്റ്. രണ്ടാമത്തേത് : ഞങ്ങള്‍ ഞങ്ങളുടെ കര്‍ത്തവ്യം പൂര്‍ണ ഉത്തരവാദിത്വത്തോടെ ചെയ്തിരിക്കും. NB : ബാക്കി ചിത്രത്തിന്റെ തുടര്‍ രംഗങ്ങളും ഭാവനയും കൊണ്ട് ആലോചിച്ചു സമ്പന്നമാക്കണ്ട,' എന്ന ക്യാപ്ഷനും ചിത്രത്തിനൊപ്പം നല്‍കിയിട്ടുണ്ട്. ആക്ഷന്‍ ഹീറോ സിനിമയില്‍ പൊലീസ് മര്‍ദ്ദനത്തിനെതിരെ സംസാരിക്കുന്ന മനുഷ്യാവകാശ പ്രവര്‍ത്തകയോട് അപമര്യാദയയായി ഞങ്ങള്‍ മര്‍ദ്ദനം തുടരുമെന്ന് നായകന്‍ നിവിന്‍ പോളി പറയുന്ന രംഗത്തിന്റെ ചിത്രമാണിത്. കേരള പൊലീസിനെതിരെ നിലവില്‍ ഉയരുന്ന വിമര്‍ശനങ്ങള്‍ക്കെതിരെയുള്ള മറപടിയാണോയെന്നാണ് പലരും ചോദിക്കുന്നത്. ഇത്രയൊക്കെ ഗുണ്ടായിസം കാണിച്ചിട്ടും ഇങ്ങനെ പൊതുസമൂഹത്തെ വെല്ലുവിളിക്കാന്‍ ആരാണ് കേരള പൊലീസിന് ധൈര്യം കൊടുത്തതെന്ന തരത്തിലുള്ള കമന്റുകളും ഉയരുന്നുണ്ട്. ഉളുപ്പില്ലാതെ ന്യായീകരിക്കുന്നു എന്നാണ് ഒരാളുടെ കമന്റ്. ഈ സ്വഭാവം തുടരാനാണ് തീരുമാനമെങ്കില്‍ ജനങ്ങളുടെ ക്ഷമ നശിക്കുമെന്നും ചിലര്‍ കമന്റ് ചെയ്തു. സംസ്ഥാനത്ത് വ്യാപകമായി പൊലീസുകാരുടെ അതിക്രമങ്ങള്‍ വര്‍ധിക്കുന്ന സാഹചര്യത്തില്‍ ജനരോഷം ശക്തമാണ്. സമൂഹമാധ്യമങ്ങളിലുള്‍പ്പെടെ നിരവധി പേര്‍ തങ്ങളുടെ പ്രതിഷേധം രേഖപ്പെടുത്തുന്നുണ്ട്.