ധീരജിന് കണ്ണീരോടെ വിട; ഇടുക്കിയില്‍നിന്ന് വിലാപയാത്ര സഞ്ചരിച്ചത് 380 കിലോമീറ്റര്‍

ഇടുക്കി ഗവ.എന്‍ജിനീയറിങ് കോളജില്‍ കൊല്ലപ്പെട്ട എസ്എഫ്‌ഐ പ്രവര്‍ത്തകന്‍ ധീരജ് രാജേന്ദ്രന് നാട് കണ്ണീരോടെ വിട നല്‍കി. രാഷ്ട്രീയ സംഘര്‍ഷത്തില്‍ യൂത്ത് കോണ്‍ഗ്രസ്- കെഎസ്യു പ്രവര്‍ത്തകരുടെ കുത്തേറ്റു മരിച്ച ധീരജിന്റെ മൃതദേഹം വഹിച്ചുള്ള വിലാപയാത്ര ഇടുക്കിയില്‍നിന്നു 380 കിലോമീറ്റര്‍ പിന്നിട്ട് രാത്രി വൈകിയാണ് തളിപ്പറമ്പിലെ വീട്ടിലെത്തിയത്. വിവിധ കേന്ദ്രങ്ങളില്‍ ആയിരങ്ങള്‍ അന്ത്യാഞ്ജലിയര്‍പ്പിച്ചു. തളിപ്പറമ്പ് തൃച്ചംബരം പാലകുളങ്ങര പട്ടപ്പാറയിലെ ധീരജിന്റെ വീടിന്റെ മതിലിനോടു ചേര്‍ന്ന് സിപിഎം വിലയ്ക്കു വാങ്ങിയ സ്ഥലത്താണ് അന്ത്യവിശ്രമം ഒരുക്കിയത്. ധീരജിന്റെ സഹോദരന്‍ അദ്വൈത് ചിതയ്ക്കു തീ കൊളുത്തി. മാതാപിതാക്കളായ പുഷ്‌ക്കലയെയും രാജേന്ദ്രനെയും അനുജന്‍ അദ്വൈതിനെയും എങ്ങനെ ആശ്വസിപ്പിക്കണമെന്നറിയാത്ത അവസ്ഥയിലായിരുന്നു നേതാക്കളും പ്രവര്‍ത്തകരും. മന്ത്രി എം.വി.ഗോവിന്ദന്‍, സിപിഎം ജില്ലാ സെക്രട്ടറി എം.വി.ജയരാജന്‍, മന്ത്രി പി.രാജീവ്, ഇ.പി.ജയരാജന്‍ എന്നിവരടക്കം നേതാക്കള്‍ വീട്ടിലെത്തി. തളിപ്പറമ്പില്‍ ഉച്ചയ്ക്കു ശേഷം ഹര്‍ത്താല്‍ ആചരിച്ചു. ഇടുക്കി മെഡിക്കല്‍ കോളജില്‍നിന്നു രാവിലെ പതിനൊന്നരയോടെയാണു പോസ്റ്റ്‌മോര്‍ട്ടം നടപടികള്‍ പൂര്‍ത്തിയാക്കി മൃതദേഹം കൈമാറിയത്. മന്ത്രി റോഷി അഗസ്റ്റിന്‍ ഉള്‍പ്പെടെയുള്ള നേതാക്കള്‍ ഏറ്റുവാങ്ങി. കോഴിക്കോട് മലാപ്പറമ്പ് ജംക്ഷനില്‍ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും മറ്റു നേതാക്കളും പുഷ്പചക്രം അര്‍പ്പിച്ചു. കൊലയ്ക്കു കാരണം രാഷ്ട്രീയ വിരോധമെന്ന് എഫ്‌ഐആര്‍ ചെറുതോണി ന്മ ധീരജ് രാജേന്ദ്രനെ കുത്തിക്കാലപ്പെടുത്തിയതു രാഷ്ട്രീയ വിരോധത്തെ തുടര്‍ന്നാണെന്നു പൊലീസ് എഫ്‌ഐആര്‍. അറസ്റ്റിലായ യൂത്ത് കോണ്‍ഗ്രസ് വാഴത്തോപ്പ് മണ്ഡലം പ്രസിഡന്റ് പീടികത്തറയില്‍ നിഖില്‍ പൈലി (29), ഇടുക്കി മണ്ഡലം വൈസ് പ്രസിഡന്റ് തടിയമ്പാട് ഇടയാല്‍ ജെറില്‍ ജോജോ (22) എന്നിവരെ ചോദ്യം ചെയ്തുവരുന്നു. ഇടുക്കി എന്‍ജിനീയറിങ് കോളജ് കെഎസ്‌യു യൂണിറ്റ് സെക്രട്ടറി അലക്‌സ് റാഫേല്‍ (21) അടക്കം 2 പേര്‍ പൊലീസ് കസ്റ്റഡിയിലുണ്ട്.