പോളണ്ടില്‍ ജോലി തരപ്പെടുത്താമെന്നു പറഞ്ഞ് ലക്ഷങ്ങള്‍ തട്ടി; ആലുവ സ്വദേശി അറസ്റ്റില്‍

പോളണ്ടില്‍ വെയര്‍ഹൗസ് വര്‍ക്കര്‍ ആയി ജോലി തരപ്പെടുത്തി നല്‍കാമെന്നു പറഞ്ഞു നിരവധി പേരില്‍ നിന്നായി ലക്ഷങ്ങള്‍ തട്ടിയെടുത്തയാള്‍ അറസ്റ്റില്‍. ആലുവ തോട്ടാട്ടുകര കടവില്‍ സന്തോഷ് ജോസഫ് (49) ആണ് അറസ്റ്റിലായത്. എറണാകുളത്ത് കോമ്പാറയില്‍ സാന്‍ജോസ് ഇന്റര്‍നാഷനല്‍ എന്ന പേരില്‍ നടത്തിയിരുന്ന സ്ഥാപനത്തിന്റെ മറവിലായിരുന്നു തട്ടിപ്പ്. എറണാകുളം സെന്‍ട്രല്‍ പൊലീസ് ഇന്‍സ്‌പെക്ടര്‍ എസ്.വിജയശങ്കറിന്റെ നേതൃത്വത്തിലുള്ള സംഘമാണ് സന്തോഷിനെ പിടികൂടിയത്. സാന്‍ജോസ് ഇന്റര്‍നാഷനല്‍ എന്ന കമ്പനി വിദേശത്തു ജോലി എന്ന പേരില്‍ ഓണ്‍ലൈന്‍ വഴി പരസ്യം നല്‍കുമായിരുന്നു. ഈ പരസ്യം കണ്ടു വന്നവരായിരുന്നു തട്ടിപ്പില്‍പെട്ടവരില്‍ ഏറെയും. പോളണ്ടില്‍ പോകുന്നതിന് 4,25,000 രൂപ വേണമെന്നും അതിന് അഡ്വാന്‍സായി 1,00,000 രൂപ നല്‍കണം എന്നും ആവശ്യപ്പെടും. പിന്നീട് ഒരു അവധി പറഞ്ഞു നീട്ടും. പരാതിക്കാരുടെ എണ്ണം കൂടിയതോടെ ഇവരുടെ ഓഫിസ് അടച്ചുപൂട്ടി. നിരവധിപ്പേരില്‍ നിന്ന് ഇത്തരത്തില്‍ ലക്ഷങ്ങള്‍ തട്ടിയെടുത്തിട്ടുണ്ട്. പൊലീസ് നടത്തിയ അന്വേഷണത്തില്‍ ഇയാള്‍ മംഗലാപുരത്ത് ഉണ്ടെന്നു മനസിലാക്കുകയും സ്ഥലത്തെത്തി പിടികൂടുകയുമായിരുന്നു. കൊച്ചി സിറ്റി ഡപ്യൂട്ടി പൊലീസ് കമ്മിഷണര്‍ കുര്യാക്കോസ്, എറണാകുളം സെന്‍ട്രല്‍ അസിസ്റ്റന്റ് കമ്മിഷണര്‍ ജയകുമാര്‍ എന്നിവരുടെ നിര്‍ദേശ പ്രകാരമായിരുന്നു അറസ്റ്റ്.