സ്വപ്നയുടെ വായ്പ കുടിശ്ശിക: ബാങ്ക് നടപടി ഒഴിവായേക്കും

തൃശൂര്‍: ആത്മഹത്യ ചെയ്ത വനിത മാനേജറുടെ 44 ലക്ഷത്തോളം രൂപയുടെ ഭവനവായ്പ കുടിശ്ശിക അടക്കാന്‍ കനറാ ബാങ്ക് കൈക്കൊണ്ട നടപടി ഒഴിവായേക്കും. വായ്പ എഴുതിത്തള്ളാന്‍ നീക്കം നടക്കുന്നതായാണ് സൂചന. ഇത്തരമൊരു കീഴ്വഴക്കം ഇല്ലാത്തതിനാല്‍ കനറാ ബാങ്ക് ഡയറക്ടര്‍ ബോര്‍ഡിന്റെ തീരുമാനമാണ് അന്തിമം. ഒറ്റത്തവണ തീര്‍പ്പാക്കലിന് അദാലത്തില്‍ ഹാജരാകാന്‍ ആവശ്യപ്പെട്ട് സ്വപ്നയുടെ പേരില്‍ കനറാ ബാങ്ക് റിക്കവറി ആന്‍ഡ് ലീഗല്‍ വിഭാഗം നോട്ടീസ് അയച്ചതായുള്ള മാധ്യമ വാര്‍ത്തയെത്തുടര്‍ന്ന് ടി.എന്‍. പ്രതാപന്‍ എം.പി തൃശൂര്‍ ജില്ലയിലെ ലീഡ് ബാങ്കായ കനറയുടെ മാനേജറുമായി ഫോണില്‍ ബന്ധപ്പെട്ടു. ശനിയാഴ്ച സ്വപ്നയുടെ ഭര്‍തൃപിതാവിന് പകരം താന്‍ അദാലത്തിന് ഹാജരാകുമെന്ന് എം.പി ബാങ്കിനെ അറിയിച്ചു. എന്നാല്‍, നോട്ടീസ് വന്നത് സാങ്കേതിക നടപടിയാണെന്നാണ് മാനേജര്‍ പറഞ്ഞതെന്ന് എം.പി പറഞ്ഞു. അങ്ങനെയെങ്കില്‍ അക്കാര്യം സ്വപ്നയുടെ ബന്ധുക്കളെ അറിയിക്കാന്‍ എം.പി ആവശ്യപ്പെട്ടു. ഇതിനിടെ, ബാങ്ക് എംപ്ലോയീസ് ഫെഡറേഷന്‍ ഓഫ് ഇന്ത്യ (ബെഫി) സംസ്ഥാന നേതാക്കള്‍ തിരുവനന്തപുരത്ത് കനറാ ബാങ്ക് സര്‍ക്കിള്‍ ജനറല്‍ മാനേജറുമായി ഈ വിഷയത്തില്‍ കൂടിക്കാഴ്ച നടത്തി. റിക്കവറി വിഭാഗം എല്ലാവര്‍ക്കും നോട്ടീസ് അയക്കുന്ന കൂട്ടത്തില്‍ സ്വപ്നയുടെ വിലാസത്തിലും പോയതാണെന്നും വായ്പ എഴുതിത്തള്ളാന്‍ സര്‍ക്കിള്‍ ഓഫിസ് ബോര്‍ഡിന് ശിപാര്‍ശ ചെയ്തിട്ടുണ്ടെന്നും ജനറല്‍ മാനേജര്‍ ബെഫി നേതാക്കളെ അറിയിച്ചു. അതേസമയം, ഇക്കാര്യത്തില്‍ എടുക്കുന്ന തീരുമാനം ബാങ്കിങ് മേഖലക്കാകെ കീഴ്വഴക്കമാകുന്ന തരത്തില്‍ ബാധകമായേക്കും എന്നതിനാല്‍ ഡയറക്ടര്‍ ബോര്‍ഡ് എല്ലാ വശവും ആലോചിച്ച് തീരുമാനമെടുക്കുമെന്നും അതിന് സാവകാശം വേണ്ടിവരുമെന്നും അറിയിച്ചു.