ഷാനെ തട്ടിക്കൊണ്ടു പോയത് കൊലപ്പെടുത്താന്‍; അഞ്ച് പ്രതികള്‍, ഒരാള്‍ കൂടി കസ്റ്റഡിയിലെന്നും പൊലീസ്

ഷാന്‍ ബാബു കൊലപാതകത്തില്‍ അഞ്ചു പേര്‍ പ്രതികളെന്ന് കോട്ടയം എസ്പി ഡി.ശില്പ. ജോമോനെ കൂടാതെ ഒരാളെ കൂടി കസ്റ്റഡിയിലെടുത്തു. ഷാന്‍ ബാബുവിനെ ഓട്ടോയില്‍ കയറ്റി കൊണ്ടുപോയത് കൊലപ്പെടുത്താന്‍ എന്നും പോലീസ് കണ്ടെത്തി.യുവാവിനെ തട്ടിക്കൊണ്ടുപോയ ഓട്ടോറിക്ഷയും കസ്റ്റഡിയില്‍ എടുത്തു. പ്രതികളെ സഹായിച്ച 13 പേരും കസ്റ്റഡിയിലായി. ഷാന്‍ ബാബുവിനെ തട്ടിക്കൊണ്ടു പോയി മര്‍ദിച്ച സ്ഥലങ്ങളും പൊലീസ് തിരിച്ചറിഞ്ഞു. മരിച്ച ഷാന്‍ ബാബുവിന്റെ പേരില്‍ കഞ്ചാവ് കേസ് ഉണ്ടെന്ന് പൊലീസ് വ്യക്തമാക്കി. 2021 ജനുവരിയില്‍ 30 കിലോ കഞ്ചാവ് കടത്തിയതിന് വാളയാറില്‍ വെച്ചാണ് ഷാന്‍ പിടിയിലായത്. ഇന്ന് പുലര്‍ച്ചെയാണ് കോട്ടയത്തെ ഞെട്ടിച്ച അരുംകൊലയുണ്ടായത്. കുപ്രസിദ്ധ ഗുണ്ട ജോമോന്‍ ജോസാണ് ഷാന്‍ എന്ന പത്തൊമ്പത് വയസുകാരനെ തട്ടിക്കൊണ്ടുപോയി തല്ലിക്കൊന്ന ശേഷം മൃതദേഹം തലച്ചുമടായി പൊലീസ് സ്റ്റേഷന് മുന്നില്‍ കൊണ്ടുപോയിട്ടത്. ജില്ലയിലെ തന്റെ തകര്‍ന്നുപോയ ഗുണ്ടാ സാമ്രാജ്യം വീണ്ടും സ്ഥാപിക്കാനായിരുന്നു ജോമോന്റെ ക്രൂരകൃത്യം. സൂര്യന്‍ എന്ന ശരത് രാജിന്റെ ഗുണ്ടാസംഘവുമായി ഷാന്‍ സൂക്ഷിച്ച സൗഹൃദമാണ് ജോമോന്റെ പകയ്ക്ക് കാരണം.