‘കുഞ്ഞു’വിനെ കൊന്നത് ഒറ്റ് സംശയിച്ച്; നഗ്‌നനാക്കി കാപ്പി വടി കൊണ്ട് അടിച്ച് കൊന്നു

യുവാവിനെ ഗുണ്ടാ നേതാവ് ജോമോന്‍ തട്ടിക്കൊണ്ടുപോയി കൊലപ്പെടുത്തിയത് പൊലീസിന് തന്നെ ഒറ്റുകൊടുത്തുവെന്ന സംശയത്തിന്റെ പേരില്‍. കൊല്ലപ്പെട്ട ഷാന്‍ എതിര്‍ സംഘാംഗങ്ങളുടെ ഒപ്പം ഉല്ലാസയാത്ര പോയതും ഫോട്ടോ സമൂഹമാധ്യങ്ങളില്‍ പങ്കുവെച്ചതും സംശയം ബലപ്പെടുത്തി. ഷാന്‍ മുഖേന എതിര്‍ സംഘത്തലവനായ സൂര്യനെ കണ്ടെത്താനും ജോമോന്‍ പദ്ധതിയിട്ടു. കൊല്ലപ്പെട്ട ഷാനിന്റെ സുഹൃത്ത് സൂര്യന്‍ ഇന്‍സ്റ്റഗ്രാമില്‍ പങ്കുവെച്ച ചിത്രമാണ് കൊലപാതകത്തിലേക്ക് നയിച്ചത്. ഷാനിനെ കൊലപ്പെടുത്തിയ ജോമോന്റെ എതിര്‍ സംഘത്തിന്റെ തലവനാണ് സൂര്യന്‍ എന്നറിയപ്പെടുന്ന കഞ്ഞിക്കുഴി സ്വദേശി ശരത് പി.രാജ്. കൊടൈക്കനാല്‍ യാത്രക്കിടയിലെടുത്ത ചിത്രം 3 ദിവസം മുമ്പ് സൂര്യന്‍ ഇന്‍സ്റ്റഗ്രാമില്‍ പങ്കുവച്ചു. ഇതിന് ലൈക്കടിച്ചതോടെയാണ് ഷാന്‍ ജോമോന്റെ നോട്ടപ്പുള്ളിയായത്. മണര്‍കാട് സ്വദേശി ലുതീഷിന്റെ ഗുണ്ടാ സംഘത്തിലെ അംഗമാണ് കേസിലെ പ്രതിയായ ജോമോന്‍. കൊല്ലപ്പെട്ട ഷാന്‍ ജോമോന്റെ ഉറ്റ സുഹൃത്തുമായിരുന്നു. ജോമോന്‍ ഷാനിനെ 'കുഞ്ഞു' എന്നാണ് വിളിച്ചിരുന്നത്. ഏതാനും മാസങ്ങള്‍ക്ക് മുന്‍പ് ജോമോന്റെ സുഹൃത്തായ ലുതീഷിനെ തൃശൂരില്‍ വച്ച് സൂര്യനും സംഘവും മര്‍ദിച്ചിരുന്നു. പ്രതികാരത്തിന് ഒരുങ്ങുന്നതിനിടെ ലുതീഷും ജോമോനും പൊലീസിന്റെ പിടിയിലായി. ഇവരെ പൊലീസ് കാപ്പ ചുമത്തി നാടു കടത്തി. ഒറ്റാണ് പൊലീസ് പിടികൂടാന്‍ കാരണമെന്ന് വിശ്വസിച്ച ജോമോന്‍ ഒറ്റിയവരെ കണ്ടെത്താനുള്ള അന്വേഷണത്തിലായിരുന്നു. ഇതിനിടെയാണ് സൂര്യനോടൊപ്പമുള്ള ഷാനിന്റെ ചിത്രം പുറത്തുവരുന്നത്. ഞായറാഴ്ച ഓട്ടോറിക്ഷയില്‍ തട്ടിക്കൊണ്ടുപോയ ഷാനിനെ ജോമോനും സംഘവും മൂന്നുമണിക്കൂറോളം അതിക്രൂരമായി മര്‍ദ്ദിച്ചു. നഗ്‌നനാക്കി നഗരത്തിന്റെ വിവിധ ഭാഗങ്ങളിലെത്തിച്ച് കാപ്പി വടികൊണ്ടായിരുന്നു മര്‍ദനം. ഷാന്‍ കൊല്ലപ്പെട്ടെന്ന് ഉറപ്പിച്ചതോടെ കൂട്ടാളികള്‍ ജോമോനെ മൃതദേഹത്തോടൊപ്പം വഴിയില്‍ ഇറക്കിവിട്ടു. പൊലീസ് ക്ലബ്ബിനു മുന്നില്‍ ഇറങ്ങിയ ജോമോന്‍ 300 മീറ്റര്‍ അകലെയുള്ള ഈസ്റ്റ് പോലീസ് സ്റ്റേഷനിലേക്ക് മൃതദേഹം ചുമലിലിട്ടാണ് എത്തിച്ചത്. ഓട്ടോ ഡ്രൈവര്‍ ഉള്‍പ്പെടെ കൃത്യത്തില്‍ നേരിട്ട് പങ്കെടുത്ത നാല് പേരെ പൊലീസ് കസ്റ്റഡിയിലെടുത്തു.