കൊല്ലുമെന്നു ഭീഷണിപ്പെടുത്തി വിദ്യാര്‍ഥിനികള്‍ക്ക് തുടര്‍ച്ചയായി പീഡനം: പ്രതികള്‍ പിടിയില്‍

വിതുര: കൊല്ലുമെന്നു ഭീഷണിപ്പെടുത്തി വിദ്യാര്‍ഥിനികളായ സഹോദരിമാരെ തുടര്‍ച്ചയായി പീഡിപ്പിച്ച കേസിലെ പ്രതികള്‍ പിടിയില്‍. പേപ്പാറ പട്ടന്‍കുളിച്ചപാറ തടത്തരികത്തു വീട്ടില്‍ രഞ്ജു എന്നു വിളിക്കുന്ന വിനോദ് (32), കിളിമാനൂര്‍ അടയമണ്‍ ചരുവിള പുത്തന്‍ വീട്ടില്‍ ശരത് (23) എന്നിവരെയാണ് കഴിഞ്ഞ ദിവസം വിതുര പോലീസ് അറസ്റ്റു ചെയ്തത്. പ്രതികളെ റിമാന്‍ഡ് ചെയ്തു. പോക്‌സോ, ജുവനൈല്‍ ജസ്റ്റിസ് ആക്ട് എന്നീ വകുപ്പുകള്‍പ്രകാരം ഇവര്‍ക്കെതിരേ കേസെടുത്തു. പെണ്‍കുട്ടികളുടെ മാതാപിതാക്കളുമായുള്ള അടുപ്പം മുതലെടുത്താണ് മൂത്തകുട്ടിയായ 16-കാരിയെ ഇയാള്‍ കൊല്ലുമെന്നു ഭീഷണിപ്പെടുത്തി തുടര്‍ച്ചയായി പീഡിപ്പിച്ചതെന്ന് പോലീസ് പറഞ്ഞു. ഭയന്ന പെണ്‍കുട്ടി വിവരം പുറത്തു പറയാത്തതോടെ ഇളയ കുട്ടിയായ 14-കാരിയേയും ഇയാള്‍ പീഡനത്തിനിരയാക്കി. തുടര്‍ന്ന് മാതാപിതാക്കള്‍ ഇല്ലാത്ത സമയത്ത് രണ്ടാം പ്രതി ശരത്തിനെയും പെണ്‍കുട്ടികളുടെ വീട്ടിലെത്തിച്ച് പീഡനത്തിനുള്ള സൗകര്യമൊരുക്കിയതായും പോലീസ് പറഞ്ഞു. രണ്ടു ദിവസം മുമ്പ് മൂത്തകുട്ടിയെ ഇയാള്‍ മറ്റൊരു വീട്ടിലെത്തിച്ചു. അന്വേഷിച്ചെത്തിയ വീട്ടുകാര്‍ കണ്ടത് പൂട്ടിയിട്ട പെണ്‍കുട്ടിയെയാണ്. പെണ്‍കുട്ടിയെ രക്ഷിച്ച ശേഷം രക്ഷാകര്‍ത്താക്കള്‍ പോലീസില്‍ പരാതി നല്‍കി. ഒളിവില്‍ പോയ വിനോദിനെ പത്തനംതിട്ടയിലെ സുഹൃത്തിന്റെ വീട്ടില്‍ നിന്നും ശരത്തിനെ പെരിങ്ങമ്മലയില്‍ നിന്നും ആണ് പിടികൂടിയത്. വിതുര സി.ഐ. എസ്.ശ്രീജിത്ത്, എസ്.ഐ. എസ്.എല്‍.സുധീഷ്, എ.എസ്.ഐ. സജു, എസ്.സി.പി.ഒ. പ്രദീപ്, സി.പി.ഒ.മാരായ ശരത്, ജസീല്‍, ജവാദ്, ഹാഷിം എന്നിവരടങ്ങിയ പോലീസ് സംഘമാണ് ഇവരെ പിടികൂടിയത്. ഒന്നാം പ്രതി വിനോദ് രണ്ടു വിവാഹം കഴിച്ചിട്ടുള്ളതായും രണ്ടു കുട്ടികള്‍ ഉണ്ടെന്നും പോലീസ് പറഞ്ഞു.