ലത കാട്ടാനയുടെ ആക്രമണത്തില്‍ കൊല്ലപ്പെട്ടെന്ന് മാവോവാദികള്‍; മൃതദേഹം പുറത്തെടുത്ത് പരിശോധിക്കും

നിലമ്പൂര്‍: വനത്തില്‍ കൊല്ലപ്പെട്ട മാവോവാദി മലമ്പുഴ ലതയുടെ മൃതദേഹം പുറത്തെടുത്ത് പരിശോധിക്കാന്‍ പോലീസ് ഒരുങ്ങുന്നു. നാടുകാണി ദളത്തിലെ അംഗമായ മലമ്പുഴ ലത നിലമ്പൂര്‍ വനമേഖലയില്‍ കഴിയുന്ന സമയത്ത് കാട്ടാനയുടെ ആക്രമണത്തില്‍ കൊല്ലപ്പെട്ടുവെന്നാണ് മാവോവാദികള്‍ പുറത്തുവിട്ട വിവരം. ഇതിലെ സത്യമറിയുകയെന്ന ലക്ഷ്യവും പരിശോധനയ്ക്കു പിന്നിലുണ്ട്. 2016 ജൂലായ്, ഓഗസ്റ്റ് മാസങ്ങളിലായാണ് സംഭവം നടന്നതെന്നാണ് മാവോവാദികള്‍ പിന്നീട് പുറത്തിറക്കിയ വാര്‍ത്താ ബുള്ളറ്റിനില്‍ വ്യക്തമാക്കിയിരുന്നത്. മൃതദേഹം വഴിക്കടവ് വനം റെയ്ഞ്ചിലുള്‍പ്പെട്ട മരുത കൂട്ടിലപ്പാറ ഭാഗത്ത് വനത്തില്‍ കുഴിച്ചിട്ടുവെന്നാണ് അറിയിച്ചത്. ജനവാസകേന്ദ്രത്തില്‍നിന്ന് 500 മീറ്ററിനും ഒരു കിലോമീറ്ററിനും ഇടയിലുള്ള സ്ഥലത്താണ് കുഴിച്ചിട്ടതെന്നാണു പോലീസിനു കിട്ടിയ വിവരം. 2021 നവംബര്‍ ഒമ്പതിന് വയനാട്ടില്‍ അറസ്റ്റിലായ സാവിത്രി എന്ന മാവോവാദിയെ കഴിഞ്ഞ മാസം നിലമ്പൂര്‍ ഡിവൈ.എസ്.പി.യുടെ കീഴില്‍ ചില കേസുകളുടെ തെളിവെടുപ്പിനായി നിലമ്പൂര്‍ മേഖലയില്‍ കൊണ്ടുവന്നിരുന്നു. വഴിക്കടവ് മരുത വനമേഖലയില്‍ ലതയെ കാട്ടാന ആക്രമിക്കുന്ന സമയത്ത് സാവിത്രിയും കൂടെയുണ്ടായിരുന്നുവെന്നാണു പറയപ്പെടുന്നത്. ഈ പശ്ചാത്തലത്തില്‍ സാവിത്രിയെ വനത്തില്‍ കൊണ്ടുപോയി ലതയുടെ മൃതദേഹം സംസ്‌കരിച്ച സ്ഥലം കണ്ടെത്തിയതായും വിവരമുണ്ട്. ലത മരിച്ചതുമായി ബന്ധപ്പെട്ട് മാവോവാദികള്‍ പറഞ്ഞ വിവരങ്ങള്‍ മാത്രമാണു പോലീസിനുള്ളത്. മാേവാവാദികളിലാരെങ്കിലും മരിച്ചാല്‍ അടുത്തുതന്നെ മറവുചെയ്യാറാണ് പതിവ്. ഇതെല്ലാം കണക്കിലെടുത്താണ് മൃതദേഹം പുറത്തെടുത്ത് പരിശോധിക്കാന്‍ ഒരുങ്ങുന്നത്.