കാനഡയില്‍ ജോലി വാഗ്ദാനം ചെയ്ത് പണം തട്ടിയ പ്രതി റിമാന്‍ഡില്‍

എടക്കര: കാനഡയില്‍ കണ്‍സ്ട്രക്ഷന്‍ കമ്പനിയില്‍ ജോലി വാഗ്ദാനം ചെയ്ത് എരുമമുണ്ട, പോത്തുകല്‍, ചുങ്കത്തറ ഭാഗങ്ങളില്‍ നിന്നുള്ള ഒമ്പതുപേരില്‍ നിന്നായി 70 ലക്ഷം രൂപ തട്ടിയെന്ന പരാതിയില്‍ അറസ്റ്റ് ചെയ്ത പ്രതിയെ കോടതി റിമാന്‍ഡ് ചെയ്തു. ചുങ്കത്തറ കുറ്റിമുണ്ടയിലെ കോട്ടയം പാമ്പാടി ടിസന്‍ കുരുവിളയെയാണ് (40) റിമാന്‍ഡ് ചെയ്തത്. ഇയാളെ കഴിഞ്ഞ ദിവസം എടക്കര പൊലീസ് അറസ്റ്റ് ചെയ്തത്. കാനഡയില്‍ താന്‍ ജോലി ചെയ്യുന്ന പി.സി.എല്‍ എന്ന നിര്‍മാണ കമ്പനിയില്‍ ജോലിക്കാരെ ആവശ്യമുണ്ടെന്ന് വിശ്വസിപ്പിച്ചായിരുന്നു തട്ടിപ്പ്. ഡല്‍ഹിയിലും പഞ്ചാബിലുമുള്ള ബാങ്ക് അക്കൗണ്ടിലേക്ക് പണം അയക്കാനായിരുന്നു ആവശ്യപ്പെട്ടിരുന്നത്. എന്നാല്‍, യഥാസമയത്ത് വിസ നല്‍കാതെ ഒഴിഞ്ഞുമാറിയതോടെയാണ് കബളിപ്പിക്കപ്പെട്ടവര്‍ പരാതിയുമായി രംഗത്തത്തെിയത്.