മദ്യപാനത്തിനിടെ വാക്കുതര്‍ക്കം; കോഴിക്കോട് കുത്തേറ്റ യുവാവ് മരിച്ചു

കോഴിക്കോട് റെയില്‍വേസ്റ്റേഷനു സമീപം കുത്തേറ്റ യുവാവ് മരിച്ചു. പാറോപ്പടി സ്വദേശി ഫൈസലിനാണ് കുത്തേറ്റത്. നരിക്കുനി സ്വദേശി ഷാനവാസാണ് കുത്തിയതെന്നാണ് പ്രാഥമികവിവരം. അടുത്ത സുഹൃത്തുക്കളായ ഇവര്‍ വിവിധ ക്രിമിനല്‍കേസുകളില്‍ പ്രതികളാണ്. മദ്യലഹരിയില്‍ വാക്കുതര്‍ക്കത്തെതുടര്‍ന്ന് കത്തിയെടുത്തു കുത്തുകയായിരുന്നുവെന്നാണ് നിഗമനം. ലിങ്ക് റോഡില്‍ സുകൃതീന്ദ്ര കല്യാണമണ്ഡപത്തിനു എതിര്‍വശത്ത് ഇരുട്ടുമൂടിയ പ്രദേശത്ത് ഫുട്പാത്തില്‍വച്ചാണ് കത്തിക്കുത്തു നടന്നത്. കുത്തിയയാള്‍ മൂന്നാം പ്ലാറ്റ്‌ഫോമിലേക്ക് ഓടിക്കയറി. ഓട്ടോത്തൊഴിലാളികളും യാത്രക്കാരും ചേര്‍ന്ന് ഇയാളെ പിടികൂടി ടൗണ്‍ പൊലീസിലേല്‍പ്പിക്കുകയായിരുന്നു. മരിച്ചയാളുടെ മൃതദേഹം ബീച്ച് ജനറല്‍ആശുപത്രിയിലേക്ക് കൊണ്ടുപോയി.