പ്രാര്‍ഥനകള്‍ വിഫലം; കരള്‍ മാറ്റിവയ്ക്കല്‍ ശസ്ത്രക്രിയ കഴിഞ്ഞ് പിറ്റേന്ന് വിഹാന്‍ യാത്രയായി

നാദാപുരം നാടിന്റെ പ്രാര്‍ഥനകള്‍ വിഫലമായി. കരള്‍ രോഗത്തിന്റെ പിടിയിലായിരുന്ന 10 മാസം മാത്രം പ്രായമായ വിഹാന്‍ യാത്രയായി. ഉമ്മത്തൂര്‍ കരിയാടന്‍കുന്നുമ്മലില്‍ ലിബീഷിന്റെയും ബിനിഷയുടെയും മകന്‍ വിഹാനാണ് നാടിനെയാകെ കണ്ണീരിലാഴ്ത്തി കോഴിക്കോട്ടെ സ്വകാര്യ ആശുപത്രിയില്‍ മരിച്ചത്. കരള്‍മാറ്റ ശസ്ത്രക്രിയ കഴിഞ്ഞ് പിറ്റേന്നാണ് വിഹാന്‍ മരണപ്പെട്ടത്. വിഹാന്റെ ചികിത്സയ്ക്കായി പഞ്ചായത്ത് പ്രസിഡന്റ് നസീമ കൊട്ടാരത്തിന്റെ നേതൃത്വത്തില്‍ നാട്ടുകാര്‍ 13 ലക്ഷം രൂപ സമാഹരിച്ചിരുന്നു. പണം ചികിത്സയ്ക്ക് തടസ്സമാകരുതെന്നായിരുന്നു നാട്ടുകാര്‍ രൂപവല്‍ക്കരിച്ച സഹായ സമിതിയുടെ തീരുമാനം. ലിബീഷിന്റെ അനുജന്‍ ലിജിത്ത് (29) ആണ് കരള്‍ നല്‍കിയത്. ശസ്ത്രക്രിയയ്ക്കു ശേഷം ലിജിത്ത് ഇതേ ആശുപത്രിയില്‍ ചികിത്സയില്‍ കഴിയുകയാണ്.