മെഡിക്കല്‍ പഠനത്തിന് തയ്യാറെടുത്ത് അച്ഛനും മകളും

കൊച്ചി: സ്വപ്നം യാഥാര്‍ത്ഥ്യമായതിന്റെ സന്തോഷത്തിലണ് ബിപിസിഎല്‍ കൊച്ചി റിഫൈനറി ഉദ്യോഗസ്ഥനായ ലഫ് കേണല്‍ ആര്‍ മുരുഗയ്യന്‍. മകളോടൊപ്പം ഇത്തവണ എംബിബിഎസ് പഠനത്തിന് തയ്യാറെടുക്കുകയാണ് അമ്പത്തിനാലുകാരനായ ഇദ്ദേഹം. ബിപിസിഎല്‍ കൊച്ചി റിഫൈനറിയില്‍ ചീഫ് മാനേജരാണ് ലഫ്റ്റനന്റ് കേണല്‍ ആ മുരുഗയ്യന്‍. മകള്‍ ശീതളിനൊപ്പമാണ് ഇദ്ദേഹം നീറ്റ് പരീക്ഷക്ക് തയ്യാറെടുത്തത്. ഇന്നലെ വന്ന അലോട്ട്‌മെന്റില്‍ മുരുഗയ്യന് ചെന്നൈ ശ്രീലളിതാംബിക മെഡിക്കല്‍ കോളേജിലും മകള്‍ ശീതളിന് പോണ്ടിച്ചേരി വിനായക മിഷന്‍ മെഡിക്കല്‍ കോളേജിലുമാണ് പ്രവേശനം ലഭിച്ചത്. ഡോക്ടറാകാനായിരുന്നു ആഗ്രഹമെങ്കിലും കുടുംബാംഗങ്ങളുടെ നിര്‍ബന്ധത്തിന് വഴങ്ങിയാണ് എഞ്ചീനീയറിംഗ് തെരഞ്ഞെടുത്തത്. ഇതിനിടയില്‍ നിയമം, ബിസിനസ് അഡ്മിനിസ്‌ട്രേഷന്‍ ബിരുദങ്ങളും കരസ്ഥമാക്കി. 31 വര്‍ഷമായി കേരളത്തില്‍ താമസമാക്കിയിട്ട്.മകള്‍ക്കൊപ്പം നീറ്റ് പരീക്ഷക്ക് പഠിക്കാന്‍ തയ്യാറെടുത്ത മുരുഗയ്യന് പൂര്‍ണ്ണ പിന്തുണയുമായി ഭാര്യ മാലതിയുമുണ്ടായിരുന്നു. പ്രായപരിധിയില്ലാതെ ആര്‍ക്ക് വേണമെങ്കിലും നീറ്റ് പരീക്ഷയെഴുതാം എന്ന സുപ്രീം കോടതിയുടെ വിധിയാണ് മുരുഗയ്യന് തന്റെ ആഗ്രഹം പൂര്‍ത്തിയാക്കാനുള്ള അവസരം നല്‍കിയത്. ആദ്യ അലോട്ട്‌മെന്റ് വന്നെങ്കിലും അടുത്തതും കൂടി വന്നതിന് ശേഷമേ ഏത് കോളേജില്‍ പ്രവേശനം നേടണമെന്ന് തീരുമാനിക്കുകയുള്ളൂ. 21 വര്‍ഷമായി തൃപ്പൂണിത്തുറയിലാണ് ഇദ്ദേഹം താമസിക്കുന്നത്.