നല്ലത് ചെയ്താല്‍ അഭിനന്ദനം, വിവാഹവാര്‍ഷികത്തിന് അവധി; പോലീസില്‍ ജനകീയ പരിഷ്‌കരണവുമായി കണ്ണൂര്‍ ഡി.ഐ.ജി

കണ്ണൂര്‍: പോലീസുകാരോട് മേലുദ്യോഗസ്ഥര്‍ മനുഷ്യത്വത്തോടെയുള്ള സമീപനവും ഇടപെടലും നിര്‍ദേശിച്ച് കണ്ണൂര്‍ റേഞ്ചില്‍ പുതിയ പരിഷ്‌കരണം. പോലീസുകാര്‍ക്ക് സ്വന്തം ജന്മദിനവും വിവാഹവാര്‍ഷികവും ആഘോഷിക്കാന്‍ അവധി നല്‍കണം. പങ്കാളിയുടെയും മക്കളുടെയും ജന്മദിനവും അവധിക്ക് പരിഗണിക്കണം. നല്ലത് ചെയ്യുമ്പോള്‍ അഭിനന്ദിക്കാന്‍ പിശുക്ക് കാട്ടേണ്ടതില്ലെന്നും ഡി.ഐ.ജി. രാഹുല്‍ ആര്‍. നായര്‍ പുറത്തിറക്കിയ സര്‍ക്കുലറില്‍ നിര്‍ദേശിക്കുന്നു. കാസര്‍കോട്, കണ്ണൂര്‍, കോഴിക്കോട്, വയനാട് എന്നീ നാല് ജില്ലകളിലാണ് ഇത് ബാധകമാകുക.മറ്റേത് ജോലിയെക്കാളും സമ്മര്‍ദം കൂടുതലാണ് പോലീസ് സേനയിലെന്ന് സര്‍ക്കുലറില്‍ പറയുന്നു. മാനസിക പിരിമുറുക്കമില്ലാതെ ജോലിചെയ്യുമ്പോഴാണ് സേനയുടെ കാര്യശേഷി കൂടുക. സമയപരിധിയില്ലാതെയാണ് ജോലി. ഇക്കാര്യം പരിഗണിച്ച് വിശ്രമവും വ്യക്തിപരവും കുടുംബപരവും സാമൂഹികവുമായ കാര്യങ്ങള്‍ക്ക് സമയവും കിട്ടത്തക്ക വിധത്തില്‍ ജോലി ക്രമീകരിക്കണമെന്നാണ് നിര്‍ദേശം. പോലീസുകാരുടെ മികച്ച പ്രവര്‍ത്തനങ്ങളെ അഭിനന്ദിക്കണം. അത് രേഖാപരമായിത്തന്നെ നല്‍കണം. പോലീസുകാരുടെ ജന്മദിനം, അവരുടെ പങ്കാളിയുടെയോ കുട്ടികളുടെയോ ജന്മദിനം, വിവാഹവാര്‍ഷികദിനം എന്നീ ദിവസങ്ങളില്‍ ഒഴിച്ചുകൂടാത്ത ക്രമസമാധാനപ്രശ്‌നങ്ങളില്ലെങ്കില്‍ അവധി നല്‍കണം. ഇത്തരത്തിലുള്ള വ്യക്തിവിവരങ്ങള്‍ ഉള്‍പ്പെടുത്തി രജിസ്റ്റര്‍ സൂക്ഷിക്കണമെന്നും നിര്‍ദേശിക്കുന്നുണ്ട്. പോലീസ് ഉദ്യോഗസ്ഥരോ അവരുടെ കുടുംബാംഗങ്ങള്‍ക്കോ വൈദ്യസഹായം ആവശ്യമുണ്ടെങ്കില്‍ മേലുദ്യോഗസ്ഥന്‍ മാനുഷികപരിഗണനയോടെ സഹായിക്കണമെന്നാണ് മറ്റൊരു നിര്‍ദേശം. ക്ഷേമപദ്ധതികളിലേക്കുള്ള സഹായത്തിനുള്ള അപേക്ഷ കാലതാമസമില്ലാതെ പോലീസ് ആസ്ഥാനത്തേക്ക് അയക്കണം. അര്‍ഹതയുള്ളവര്‍ക്ക് അത് ലഭിച്ചില്ലെങ്കില്‍, അതിന്റെ വിവരങ്ങള്‍ റേഞ്ച് ഓഫീസിലും അറിയിക്കണം. ഈ നിര്‍ദേശങ്ങള്‍ നടപ്പാക്കുന്നുണ്ടോയെന്ന് പരിശോധിക്കാനും ഡി.ഐ.ജി. തീരുമാനിച്ചിട്ടുണ്ട്. അതിനാണ് രജിസ്റ്റര്‍ സൂക്ഷിക്കണമെന്ന വ്യവസ്ഥ ഉള്‍പ്പെടുത്തിയത്. മാര്‍ച്ച് ഒന്നിന് ഇതിന്റെ നിര്‍വഹണം വിലയിരുത്താന്‍ പ്രത്യേക യോഗവും ഡി.ഐ.ജി. നിശ്ചയിച്ചിട്ടുണ്ട്.