സമൂഹമാധ്യമത്തിലൂടെ അപമാനിച്ചു: യൂത്ത് ലീഗ് പ്രവര്‍ത്തകനെതിരെ മുന്‍ ഹരിത പ്രവര്‍ത്തക

മലപ്പുറം എംഎസ്എഫ് മുന്‍ ഭാരവാഹിയും ഹരിതയുടെ സജീവ പ്രവര്‍ത്തകയുമായിരുന്ന പെണ്‍കുട്ടിയെ യൂത്ത് ലീഗ് പ്രവര്‍ത്തകന്‍ സമൂഹമാധ്യമങ്ങളിലൂടെ അപമാനിക്കാന്‍ ശ്രമിച്ചതായി പരാതി. കണ്ണൂര്‍ സര്‍ സയ്ദ് കോളജ് മുന്‍ എംഎസ്എഫ് വൈസ് പ്രസിഡന്റ് ആഷിഖ ഖാനമാണ് പൊലീസില്‍ പരാതി നല്‍കിയത്. മലപ്പുറം ചാപ്പനങ്ങാടിയിലെ മുഹമ്മദ് അനീസ് ആണ് ആഷിഖയെ സമൂഹമാധ്യമങ്ങളിലൂടെ അപമാനിക്കാന്‍ ശ്രമിച്ചതെന്നു സൈബര്‍ സെല്‍ നടത്തിയ അന്വേഷണത്തില്‍ കണ്ടെത്തി. വ്യാജ പ്രൊഫൈലുപയോഗിച്ച് തന്നെ കഴിഞ്ഞ ആറുമാസമായി അപമാനിക്കുന്നതായി ആഷിഖയുടെ പരാതിയില്‍ പറയുന്നു. കുടുംബം മാനസിക പ്രയാസത്തിലായ സാഹചര്യത്തിലാണ് പൊലീസില്‍ പരാതി നല്‍കിയതെന്ന് ആഷിഖ പറഞ്ഞു. മുഹമ്മദ് അനീസ് യൂത്ത് ലീഗ് പ്രവര്‍ത്തകനാണെന്നും, എംഎസ്എഫ് ജില്ലാ ഭാരവാഹിക്കൊപ്പമാണ് ചോദ്യം ചെയ്യലിനു പൊലീസ് സ്റ്റേഷനിലെത്തിയതെന്നും സംഭവത്തില്‍ മുസ്ലിം ലീഗ് നേതൃത്വത്തിന് പരാതി നല്‍കുമെന്നും ആഷിഖ പറഞ്ഞു. എന്നാല്‍, സംഭവത്തില്‍ പങ്കില്ലെന്നാണ് എംഎസ്എഫ് നേതാക്കളുടെ വാദം. ആരോപണ വിധേയനൊപ്പം പൊലീസ് സ്റ്റേഷനില്‍ പോയെന്ന ആരോപണവും എംഎസ്എഫ് ജില്ലാ ജനറല്‍ സെക്രട്ടറി വഹാബ് ചാപ്പനങ്ങാടി നിഷേധിച്ചു.