കള്ളുഷാപ്പില്‍ നിന്ന് ഭക്ഷണം കഴിച്ച ശേഷം പണം നല്‍കാതെ മുങ്ങി; നാട്ടുകാര്‍ ഓടിച്ചിട്ട് പിടികൂടി

കുമരകം : കള്ളുഷാപ്പില്‍ നിന്ന് ഭക്ഷണം കഴിച്ച ശേഷം പണം നല്‍കാതെ കാറില്‍ കടന്നു കളഞ്ഞ 2 പേരെ നാട്ടുകാര്‍ ഓടിച്ചിട്ട് പിടികൂടി പൊലീസിനു കൈമാറി. തിരുവനന്തപുരം സ്വദേശികളാണു പിടിയിലായത്. കുമരകം കണ്ണാടിച്ചാലിനു സമീപത്തെ ഷാപ്പിലാണു സംഭവം. ഇന്നലെ ഉച്ചയോടെ 2 പേര്‍ ഷാപ്പിലെത്തി. ഇവിടത്തെ പ്രത്യേക മുറിയില്‍ ഇരുന്നു കരിമീന്‍ മപ്പാസും താറാവു കറിയും ഉള്‍പ്പെടെ ആയിരത്തിലേറെ രൂപയുടെ ഭക്ഷണം കഴിച്ചു. കാര്‍ ഓടിച്ചിരുന്ന ആള്‍ ആദ്യം കൈ കഴുകി കാറിലിരുന്നു. ഷാപ്പിലെ ജീവനക്കാരന്‍ ബില്ലെടുക്കാന്‍ പോയ സമയം നോക്കി രണ്ടാമത്തെ ആളും കൈ കഴുകി കാറില്‍ കയറി. ബില്ലുമായി വന്ന ജീവനക്കാരന്‍ കാര്‍ വിട്ടു പോകുന്നതാണു കാണുന്നത്. സമീപത്തെ താറാവു കടക്കാരനോടു വിവരം പറഞ്ഞു കാര്‍ തടയാന്‍ നോക്കിയെങ്കിലും വെട്ടിച്ചു കടന്നു പോയി. ഇതേത്തുടര്‍ന്ന് ജീവനക്കാര്‍ ബൈക്കില്‍ പിന്നാലെ വിട്ടു. ഇല്ലിക്കല്‍ ഷാപ്പിലെ ജീവനക്കാരെയും പരിചയക്കാരെയും ഫോണില്‍ വിളിച്ചു വിവരം പറയുകയും ചെയ്തു. കാര്‍ ഇല്ലിക്കല്‍ എത്തിയപ്പോഴേക്കും നാട്ടുകാര്‍ തടഞ്ഞു. ഷാപ്പിലെ ജീവനക്കാരെത്തി പണം ചോദിച്ചെങ്കിലും പണം നല്‍കാന്‍ തയാറായില്ല. പൊലീസില്‍ വിവരം അറിയിച്ചതിനെത്തുടര്‍ന്ന് ഇരുവരെയും സ്റ്റേഷനിലേക്കു കൊണ്ടു പോയി. പിന്നീട് ഗൂഗിള്‍ പേ വഴി പണം ഷാപ്പ് ഉടമയ്ക്കു നല്‍കി.