നിര്‍മാണ ചെലവ് 825 കോടി, പിരിച്ചെടുത്തത് 1000 കോടി; പാലിയേക്കര ടോള്‍ പിരിവ് തുടങ്ങിയിട്ട് 10 വര്‍ഷം

തൃശൂര്‍ പാലിയേക്കരയില്‍ ടോള്‍ പിരിവ് തുടങ്ങിയിട്ട് പത്തു വര്‍ഷം പൂര്‍ത്തിയായപ്പോള്‍, ഇതിനോടകം ആയിരം കോടി രൂപയാണ് ടോള്‍ പിരിച്ചെടുത്തത്. 'ഇനി മതി ടോള്‍' എന്ന പേരില്‍ കോണ്‍ഗ്രസിന്റെ നേതൃത്വത്തില്‍ നവമാധ്യമങ്ങളില്‍ പ്രചാരണം തുടങ്ങി. 2012 ഫെബ്രുവരി പത്തിനാണ് തൃശൂര്‍ പാലിയേക്കരയില്‍ ടോള്‍ പിരിവ് ആരംഭിച്ചത്. മണ്ണുത്തി-അങ്കമാലി ദേശീയപാതയില്‍ പാലിയേക്കരയിലെ ഈ ടോള്‍പ്ലാസ ഒട്ടേറെ സമരങ്ങള്‍ക്ക് വേദിയായിരുന്നു. യാത്രക്കാരും ടോള്‍ പ്ലാസ ജീവനക്കാരും തമ്മില്‍ നിരന്തരം ഏറ്റുമുട്ടലുകള്‍ ഉണ്ടായി. ആയിരം കോടി രൂപ പിരിച്ചിട്ടും ടോള്‍ പിരിവ് തുടരുന്നത് നീതികേടാണെന്ന് കോണ്‍ഗ്രസ് പറയുന്നു. ? ജനങ്ങളുടെ പ്രതികരണം അറിയാന്‍ നവമാധ്യമങ്ങളില്‍ അഭിപ്രായ വോട്ടെടുപ്പുകളുള്‍പ്പടെയുള്ള പ്രത്യേക ക്യാംപയിനിനും കോണ്‍ഗ്രസ് നേതൃത്വം തുടങ്ങിവച്ചു. നിരന്തരമായ കരാര്‍ലംഘനമാണ് ടോള്‍ കമ്പനിയുടെ ഭാഗത്തു നിന്ന് ഉണ്ടാകുന്നതെന്ന് ആക്ഷേപമുണ്ട്. കരാര്‍ കമ്പനിയെ ഒഴിവാക്കാന്‍ ദേശീയപാത അധികൃതര്‍ തയാറാകണമെന്ന് ജില്ലയിലെ കോണ്‍ഗ്രസ് നേതൃത്വം ആവശ്യപ്പെട്ടു. ടോള്‍ പിരിവ് അവസാനിക്കേണ്ടത് 2028 ജൂണിലാണ്. അപ്പോഴേയ്ക്കും നാലായിരം കോടിയിലേറെ രൂപ പിരിച്ചെടുക്കാന്‍ ടോള്‍ കമ്പനിയ്ക്കു കഴിയും. 825 കോടി രൂപയാണ് ദേശീയപാതയുടെ നിര്‍മാണ ചെലവ്. ഇതിന്റെ നാലിരട്ടി തുകയാണ് ടോള്‍ പിരിവിലൂടെ കീശയിലാക്കുന്നത്.