പൂട്ടിയ 92 മദ്യക്കടകള്‍ തുറക്കണമെന്ന് ബിവറേജസ് കോര്‍പ്പറേഷന്‍; 175 ഷോപ്പുകള്‍കൂടി തുറക്കാനും നീക്കം

ഉമ്മന്‍ചാണ്ടി സര്‍ക്കാരിന്റെ കാലത്ത് പൂട്ടിയതുള്‍പ്പെടെ 92 മദ്യവില്‍പ്പന കേന്ദ്രങ്ങള്‍ തുറക്കാന്‍ ബിവറേജസ് കോര്‍പ്പറേഷന്‍ അനുമതി തേടി. തിരക്ക് കുറയ്ക്കാന്‍ കൂടുതല്‍ മദ്യവില്‍പ്പന കേന്ദ്രങ്ങള്‍ തുറക്കുന്നതിന്റെ ഭാഗമായാണിത്.ഇതോടൊപ്പം പുതുതായി 175 ഷോപ്പുകള്‍കൂടി തുറക്കാനും അപേക്ഷ നല്‍കിയിട്ടുണ്ട്. ശുപാര്‍ശ സര്‍ക്കാരിന്റെ പരിഗണനയിലാണ്. ആവശ്യം അംഗീകരിച്ചാല്‍ സംസ്ഥാനത്ത് ബിവറേജസ് കോര്‍പ്പറേഷന്റെ മദ്യക്കടകള്‍ ഇരട്ടിയാകും. യു.ഡി.എഫ്. സര്‍ക്കാരിന്റെ കാലത്ത് മദ്യനയത്തിന്റെ ഭാഗമായി ബാറുകള്‍ പൂട്ടിയിരുന്നു. ഇതോടൊപ്പം വര്‍ഷംതോറും മദ്യവില്പനശാലകളുടെ എണ്ണം 10 ശതമാനം കുറയ്ക്കാനും തീരുമാനിച്ചു. ദൂരപരിധി നിയമം അനുസരിച്ചും ചില വില്‍പ്പനശാലകള്‍ പൂട്ടി. ഇങ്ങനെയാണ് 92 മദ്യവില്‍പ്പന കേന്ദ്രങ്ങള്‍ പൂട്ടിയത്.ഇടതുമുന്നണി അധികാരത്തില്‍ വന്നപ്പോള്‍ മദ്യനയം തിരുത്തി. ബാറുകള്‍ തുറക്കാന്‍ അനുവദിച്ചതിനൊപ്പം ബിവറേജസ് ഷോപ്പുകളുടെ എണ്ണം വര്‍ഷംതോറും കുറയ്ക്കാനുള്ള തീരുമാനവും ഉപേക്ഷിച്ചു. എന്നാല്‍ അന്ന് പൂട്ടിയവ തുറന്നില്ല. പുതിയ വില്‍പ്പനശാലകള്‍ അനുവദിച്ചുമില്ല. പുതിയവ അനുവദിക്കുന്നതിനൊപ്പം നേരത്തേ പൂട്ടിയവയും തുറക്കണമെന്നാണ് ബിവറേജസ് കോര്‍പ്പറേഷന്റെ ആവശ്യം. മദ്യവില്‍പ്പന കേന്ദ്രങ്ങളിലെ തിരക്ക് കുറയ്ക്കാന്‍ നടപടിയെടുക്കണമെന്ന് ഹൈക്കോടതി വിധിച്ചിരുന്നു. അതു പരിഗണിച്ച്, നഗരമേഖലകളില്‍ കൂടുതല്‍ കടകള്‍ തുടങ്ങാനാണ് തീരുമാനം. ഇപ്പോള്‍ 270 വില്‍പ്പനശാലകള്‍ക്ക് അനുമതിയുണ്ടെങ്കിലും 266 എണ്ണമാണ് പ്രവര്‍ത്തിക്കുന്നത്. പൂട്ടിയവയും അനുമതി തേടിയ പുതിയ വില്‍പ്പനശാലകളും തുറന്നാല്‍ മദ്യവില്‍പ്പനശാലകളുടെ എണ്ണം 535 ആകും. ബിവറേജസ് കോര്‍പ്പറേഷനു പുറമേ കണ്‍സ്യൂമര്‍ഫെഡ് നടത്തുന്ന 40 മദ്യക്കടകളും കേരളത്തിലുണ്ട്. എഴുന്നൂറോളം ബാറുകളുമുണ്ട്.