‘പരാതിക്കാരി സ്വയം വന്നത്; പാര്‍ട്ടിയില്‍ പല സെലിബ്രിറ്റികളും പങ്കെടുത്തു’: അഞ്ജലി

കൊച്ചിന്മ ഫോര്‍ട്ട് കൊച്ചി നമ്പര്‍ 18 ഹോട്ടലില്‍ പീഡനം നടന്നെന്ന പോക്‌സോ കേസില്‍ ഹോട്ടല്‍ ഉടമ റോയി വയലാറ്റിനെ അറിയില്ലെന്ന് കേസിലെ മൂന്നാം പ്രതി അഞ്ജലി റീമ ദേവ്. പ്രായപൂര്‍ത്തിയാവാത്ത പെണ്‍കുട്ടികളുമായി പരാതിക്കാരി ഡിജെ പാര്‍ട്ടിക്ക് സ്വയം വന്നതാണെന്നും ഹോട്ടലില്‍ ലൈംഗിക അതിക്രമം നടന്നിട്ടില്ലെന്നും അഞ്ജലി പറഞ്ഞു. പല സെലിബ്രിറ്റികളും പങ്കെടുത്ത പാര്‍ട്ടിയാണ്. പാര്‍ട്ടി കഴിഞ്ഞ് അവര്‍ സന്തോഷത്തോടെ മടങ്ങി. സിസിടിവി ദൃശ്യങ്ങള്‍ ഇതിനു തെളിവെന്നും അഞ്ജലി പറഞ്ഞു. 'പരാതിക്കാരി പറയുന്നതെല്ലാം പച്ചക്കള്ളമാണ്. പെണ്‍കുട്ടികളുമായി പരാതിക്കാരി സ്വമേധയായാണ് ഡിജെ പാര്‍ട്ടിക്ക് വന്നത്. ബിസിനസ് മീറ്റ് എന്ന് തെറ്റിദ്ധരിപ്പിച്ച് കൊണ്ട് പോയതല്ല. ലൈംഗിക ഉപദ്രവം ഉണ്ടായി എന്ന് ആരോപിക്കുന്ന പരാതിക്കാരി അവസാനം വരെ സന്തോഷത്തോടെ പാര്‍ട്ടിയില്‍ പങ്കെടുത്തു. ആരും മോശമായി പെരുമാറിയിട്ടില്ല. ഡിജെ പാര്‍ട്ടിക്ക് ശേഷം സന്തോഷത്തോടെയാണ് പരാതിക്കാരിയും സംഘവും മടങ്ങിയത്'- അഞ്ജലി പറഞ്ഞു. പരാതിക്കാരിയുടെ ആരോപണങ്ങള്‍ നിഷേധിച്ച് ഫെയ്‌സ്ബുക് വിഡിയോ വഴി അഞ്ജലി നേരത്തെ രംഗത്തെത്തിയിരുന്നു. അതിനു പുറമേയാണ് കൂടുതല്‍ അവകാശവാദങ്ങള്‍ പങ്കുവച്ചത്.