കൊച്ചിയില്‍ ഹോട്ടല്‍ മുറിയെടുത്ത് എംഡിഎംഎ വില്‍പന; യുവതി ഉള്‍പ്പെടെ 8 പേര്‍ അറസ്റ്റില്‍

കൊച്ചി: ഗുരുതരമായ ആരോഗ്യ പ്രശ്‌നങ്ങളുണ്ടാക്കുന്ന രാസ ലഹരിമരുന്നായ മെത്തലിന്‍ ഡയോക്‌സി മെത്തഫിറ്റമിന്‍ എന്ന എംഡിഎംഎ കൊച്ചിയില്‍ എത്തിച്ച് വില്‍പന നടത്തിയ സംഘം അറസ്റ്റില്‍. മാമംഗലത്ത് ഹോട്ടലില്‍ മുറിയെടുത്തായിരുന്നു ലഹരി വില്‍പന. എക്‌സൈസ് എന്‍ഫോഴ്‌സ്‌മെന്റിന്റെ റെയ്ഡില്‍ ഒരു യുവതി ഉള്‍പ്പെടെ എട്ട് പേര്‍ അറസ്റ്റിലായി. കൊല്ലം, കണ്ണൂര്‍, ആലപ്പുഴ, മലപ്പുറം സ്വദേശികളാണ് അറസ്റ്റിലായത്. ഇവരില്‍ നിന്ന് 60 ഗ്രാം എംഡിഎംഎ പിടികൂടി. ഗള്‍ഫില്‍ നിന്നുള്ള പരിചയത്തിന്റെ പുറത്താണ് പ്രതികള്‍ ഹോട്ടലില്‍ മുറിയെടുത്തത്. ഹോട്ടലില്‍ വിശദമായി പരിശോധന നടത്തിയതിനു ശേഷമേ പ്രതികളുടെ പേരോ മറ്റുവിവരങ്ങളോ പുറത്തുവിടുകയുള്ളു. ബെംഗളൂരുവിലെത്തിയ നൈജീരിയക്കാരില്‍ നിന്നാണ് എംഡിഎംഎ ലഭിച്ചതെന്ന് പ്രതികള്‍ മൊഴി നല്‍കി. ഇവരുടെ വാഹനങ്ങളും മൊബൈല്‍ ഫോണും പിടിച്ചെടുത്തു. എക്സ്റ്റസി, മോളി, എക്സ് തുടങ്ങിയ പേരുകളില്‍ അറിയപ്പെടുന്ന മെത്തലിന്‍ ഡയോക്‌സി മെത്തഫിറ്റമിന്‍ ഒറ്റത്തവണത്തെ ഉപയോഗം കൊണ്ടുതന്നെ അടിമയാകുമെന്നാണ് വിദഗ്ധര്‍ പറയുന്നത്.