പാറമേക്കാവ് ഉത്സവം: ആന എഴുന്നള്ളിപ്പിനുള്ള അനുമതി തടഞ്ഞ് സര്‍ക്കാര്‍; ആറാട്ട് ആശങ്കയില്‍

തൃശൂര്‍ന്മ പാറമേക്കാവ് ഉത്സവത്തില്‍ ഇന്നു (വ്യാഴം) രാത്രി നടക്കുന്ന ആറാട്ടില്‍ ആനയെ എഴുന്നള്ളിക്കുന്നതു സര്‍ക്കാര്‍ തടഞ്ഞു.15 ആനയെ എഴുന്നള്ളിക്കാന്‍ അനുമതി നല്‍കിയ കലക്ടറോട് അതു പിന്‍വലിക്കാന്‍ പ്രിന്‍സിപ്പല്‍ സെക്രട്ടറി അടിയന്തര സന്ദേശം നല്‍കി. ഇതോടെ രാത്രി നടക്കേണ്ട ആറാട്ട് ആശങ്കയിലായി. 2013ലെ വനം വകുപ്പു സര്‍ക്കുലര്‍ പ്രകാരം പുതിയ ഉത്സവങ്ങള്‍ക്ക് അനുമതി നല്‍കരുതെന്നു കലക്ടര്‍ക്കു ചിലര്‍ പരാതി നല്‍കിയിരുന്നു. എന്നാല്‍ സുപ്രീം കോടതി ഉത്തരവില്‍ എഴുന്നള്ളിപ്പ് തുടങ്ങരുതെന്നു പറയുന്നില്ലെന്നും നിരുത്സാഹപ്പെടുത്തണമെന്നാണു പറയുന്നതെന്നും ആന മോണിറ്ററിങ് കമ്മിറ്റി കലക്ടറെ അറിയിച്ചിരുന്നു. ഇതോടെയാണു തീരുമാനം സര്‍ക്കാരിനു വിടാന്‍ തീരുമാനിച്ചത്. വനം വകുപ്പു സര്‍ക്കുലര്‍ അനുസരിച്ചു എഴുന്നള്ളിപ്പ് അനുവദിക്കാനാകില്ലെന്നു പ്രിന്‍സിപ്പല്‍ സെക്രട്ടറി വ്യക്തമാക്കി. ആവശ്യമായ നടപടി സ്വകരിക്കാന്‍ കലക്ടര്‍ക്ക് അടിയന്തര സന്ദേശം നല്‍കി. എല്ലാ അനുമതിയും നല്‍കിയ ശേഷം അതു പിന്‍വലിക്കുകയാണെങ്കില്‍ കലക്ടര്‍ക്കെതിരെ കോടതിയെ സമീപിക്കുമെന്നും ആറാട്ട് തടയുമെന്നു തങ്ങള്‍ കരുതുന്നില്ലെന്നും ദേവസ്വം വ്യക്തമാക്കി. സുപ്രീം കോടതി വിധി തോന്നിയതുപോലെ വ്യാഖ്യാനിക്കാനാകില്ല. മാത്രമല്ല ഉത്സവം നടത്തരുതെന്നുപോലും വനം വകുപ്പ് ഉത്തരവിട്ടിട്ടുണ്ട്. ഇങ്ങനെ ഉത്തരവിടാന്‍ വനം വകുപ്പിന് അധികാരമില്ലെന്നും ദേവസ്വം ചൂണ്ടിക്കാട്ടി.