പൊട്ടാത്ത വലിയ ഓലപ്പടക്കങ്ങള്‍, ചാക്കു നൂല്‍; ചെരണ്ടത്തൂരിലെ പൊട്ടിത്തെറി സ്ഫോടകവസ്തു നിര്‍മാണത്തിനിടെ

വടകര : ചെരണ്ടത്തൂര്‍ മൂഴിക്കല്‍ ഐ.എച്ച്.ഡി.പി. കോളനിയില്‍ വീടിന്റെ ടെറസിനു മുകളില്‍ സ്ഫോടനമുണ്ടായത് പടക്കങ്ങളില്‍നിന്ന് കരിമരുന്നെടുത്ത് ഉഗ്രശേഷിയുള്ള സ്ഫോടകവസ്തു നിര്‍മിക്കുന്നതിനിടെയെന്ന് പ്രാഥമിക നിഗമനം. ബോംബ് നിര്‍മാണമാണ് ലക്ഷ്യമിട്ടതെന്നും പോലീസ് സംശയിക്കുന്നു. ഇതിലേക്ക് വിരല്‍ചൂണ്ടുന്ന തെളിവുകള്‍ സ്ഥലത്തുനിന്ന് പോലീസ് ശേഖരിച്ചു. പൊട്ടാത്ത രണ്ടു വലിയ ഓലപ്പടക്കങ്ങള്‍, അഴിച്ചെടുത്ത ഓലയുടെ അവശിഷ്ടങ്ങള്‍, പുതിയത് കെട്ടാനായി കൊണ്ടുവന്ന ചാക്കുനൂലുകള്‍, കരിമരുന്നിന്റെ അവശിഷ്ടം തുടങ്ങിയവയാണ് കിട്ടിയത്. കൂടാതെ സ്‌ഫോടകവസ്തു നിര്‍മിക്കുമ്പോള്‍ സംരക്ഷണകവചമായി ഒരു മരക്കഷണം ഉപയോഗിച്ചതായും സൂചനയുണ്ട്. തകര്‍ന്നതും രക്തക്കറയുള്ളതുമായ മരക്കഷണം വീടിന്റെ മുറ്റത്തുനിന്നും കണ്ടെടുത്തു. ബുധനാഴ്ച വൈകീട്ട് ആറരയോടെയാണ് ഉഗ്രശബ്ദത്തോടെ മീത്തലെ മൂഴിക്കല്‍ ബാലന്റെ വീട്ടില്‍ സ്ഫോടനമുണ്ടായത്. സ്ഫോടനത്തില്‍ ബാലന്റെ മകന്‍ മണിക്കുട്ടന്‍ എന്ന ഹരിപ്രസാദിന്റെ (28) കൈപ്പത്തികള്‍ തകര്‍ന്നിരുന്നു. അപകടകരമായ വിധത്തില്‍ സ്ഫോടകവസ്തു കൈകാര്യം ചെയ്തതിനും സ്ഫോടനത്തിനും വടകര പോലീസ് കേസെടുത്തിട്ടുണ്ട്. ഹരിപ്രസാദ് മൊടക്കല്ലൂര്‍ മെഡിക്കല്‍ കോളേജ് ആശുപത്രിയിലാണുള്ളത്. ഇയാളില്‍നിന്ന് മൊഴിയെടുത്തശേഷം കൂടുതല്‍ നടപടികളിലേക്ക് കടക്കുമെന്ന് പോലീസ് പറഞ്ഞു. രാത്രിതന്നെ ബോംബ് സ്‌ക്വാഡ്, ഡോഗ് സ്‌ക്വാഡ് എന്നിവരെല്ലാം സ്ഥലത്ത് പരിശോധന നടത്തിയിരുന്നു. വ്യാഴാഴ്ച രാവിലെ ഫൊറന്‍സിക് വിദഗ്ധരും ബോംബ്-ഡോഗ് സ്‌ക്വാഡും വീണ്ടും പരിശോധന നടത്തി തെളിവുകള്‍ ശേഖരിച്ചു. കോഴിക്കോട് റൂറല്‍ എസ്.പി. ഡോ. എ. ശ്രീനിവാസ്, വടകര ഡിവൈ.എസ്.പി. കെ.കെ. അബ്ദുള്‍ ഷെറീഫ്, വടകര എസ്.ഐ. എം. നിജീഷ് എന്നിവരും സ്ഥലത്തെത്തി നടപടികള്‍ക്ക് നേതൃത്വം നല്‍കി. വീടും പരിസരപ്രദേശങ്ങളുമെല്ലാം പോലീസ് വിശദമായി പരിശോധിച്ചു. ആര്‍.എസ്.എസ്.-ബി.ജെ.പി. പ്രവര്‍ത്തകനായ ഹരിപ്രസാദിന്റെ നേതൃത്വത്തില്‍ ബോംബ് നിര്‍മാണമാണ് നടന്നതെന്ന ആരോപണവുമായി വിവിധ സംഘടനകള്‍ രംഗത്തെത്തിയിട്ടുണ്ട്. എന്നാല്‍, ഇയാള്‍ ഇപ്പോള്‍ ബി.ജെ.പി-ആര്‍.എസ്.എസ്. പ്രവര്‍ത്തകനല്ലെന്ന് നേതൃത്വങ്ങള്‍ വ്യക്തമാക്കി. ഒന്നരവര്‍ഷംമുമ്പ് സംഘടനാവിരുദ്ധപ്രവര്‍ത്തനത്തിന് പാര്‍ട്ടിയില്‍നിന്ന് പുറത്താക്കിയതാണെന്ന് ബി.ജെ.പി. മണ്ഡലം കമ്മിറ്റി അറിയിച്ചു.