ശ്രീനിജിനെ അപകീര്‍ത്തിപ്പെടുത്തി: ബ്ലോക്ക് ഡിവിഷന്‍ അംഗം റെസീന അറസ്റ്റില്‍

കുന്നത്തുനാട് എംഎല്‍എ പി.വി.ശ്രീനിജിനെ സമൂഹമാധ്യമങ്ങളിലൂടെ അപകീര്‍ത്തിപ്പെടുത്തി എന്നാരോപിച്ചു നല്‍കിയ പരാതിയില്‍ ബ്ലോക്ക് ഡിവിഷന്‍ അംഗത്തെ അറസ്റ്റു ചെയ്തു. വടവുകോട് ബ്ലോക്ക് വെമ്പിള്ളി ഡിവിഷന്‍ അംഗം റെസീന പരീതിനെ പുത്തന്‍കുരിശ് പൊലീസാണ് അറസ്റ്റു ചെയ്തത്. എംഎല്‍എയും കിഴക്കമ്പലത്തു മരണപ്പെട്ട ട്വന്റി20 ഏരിയ സെക്രട്ടറി ദീപുവും ഒരുമിച്ചു നില്‍ക്കുന്ന ചിത്രങ്ങള്‍ വ്യാജമായി കൂട്ടിച്ചേര്‍ത്തു പ്രചരിപ്പിച്ചു എന്ന പരാതിയിലാണ് നടപടി. ട്വന്റി20യുടെ വിളക്കണയ്ക്കല്‍ സമരവുമായി ബന്ധപ്പെട്ട് ദീപുവിനു മര്‍ദനമേറ്റതിനു പിന്നാലെ രാഷ്ട്രീയ സംഘര്‍ഷത്തിന് റസീന ശ്രമിച്ചതായാണ് ആരോപണം. കുന്നത്തുനാട് പഞ്ചായത്ത് അംഗം നിസാര്‍ ഇബ്രാഹിമിനെതിരെ സൈബര്‍ പ്രചാരണം ഉണ്ടായ സംഭവത്തില്‍ ഇവര്‍ക്കെതിരെ അമ്പലമേട് പൊലീസില്‍ പരാതി നല്‍കിയിരുന്നു. ഈ സംഭവത്തിലും കേസെടുത്തിട്ടുണ്ട്. ഇവരുടെ മൊബൈല്‍ ഫോണ്‍ ഉള്‍പ്പെടെയുള്ളവ പൊലീസ് കസ്റ്റഡിയില്‍ എടുത്തു. അതേ സമയം ഇവര്‍ പ്രചരിപ്പിച്ചെന്നു പറയുന്ന ചിത്രം കൂട്ടിച്ചേര്‍ത്തതല്ല, യഥാര്‍ഥത്തില്‍ ഉള്ളതു തന്നെയാണ് എന്ന വാദമാണ് ട്വന്റി20 പ്രവര്‍ത്തകര്‍ ഉന്നയിക്കുന്നത്.