അശ്ലീല ചാറ്റ് വ്യാജ സ്‌ക്രീന്‍ഷോട്ടുണ്ടാക്കി പ്രചരിപ്പിച്ചെന്ന് പരാതി: മോഡല്‍ രശ്മി ആര്‍. നായര്‍ക്കെതിരെ കേസ്

മോഡല്‍ രശ്മി ആര്‍. നായര്‍ക്കെതിരെ കേസ്. യുവാവിന്റെ പേരില്‍ അശ്ലീല ചാറ്റ് വ്യാജമായി നിര്‍മിച്ച് പ്രചരിപ്പിച്ചു എന്ന പരാതിയിലാണ് കേസ്. മലപ്പുറം വെന്നിയൂര്‍ ചുള്ളിപ്പാറ സ്വദേശി ഇജാസ് അസ്ലാമാണ് തിരൂരങ്ങാടി പൊലീസില്‍ പരാതി നല്‍കിയത്. അശ്ലീല ഭാഷയില്‍ ചാറ്റ് ചെയ്തെന്ന് ചൂണ്ടിക്കാട്ടി യുവാവിനെതിരെ രശ്മി ആരോപണമുന്നയിച്ചിരുന്നു. ഇജാസിന്റെ ചാറ്റെന്ന പേരില്‍ വ്യാജ സ്‌ക്രീന്‍ഷോട്ടുണ്ടാക്കി ഫേസ്ബുക്കില്‍ പങ്കുവയ്ക്കുകയും ചെയ്തു. കൂടാതെ സംഭവവുമായി ബന്ധപ്പെട്ട് കര്‍ണാടക പൊലീസില്‍ പരാതി നല്‍കിയിട്ടുണ്ടെന്നും രശ്മി വെളിപ്പെടുത്തി. കോണ്‍ഗ്രസ് എം.എല്‍.എയായ രാമലിംഗ റെഡ്ഢി പരാതി നല്‍കുന്നതിന് സഹായമായി നിന്നെന്നും ആരോപണമുണ്ട്.എന്നാല്‍, രശ്മി നായര്‍ എന്നയാളെ തനിക്ക് അറിയില്ലെന്നും ഇത്തരത്തില്‍ ആര്‍ക്കും സഹായം വാഗ്ദാനം ചെയ്തിട്ടില്ലെന്നും രാമലിംഗ റെഡ്ഢി പ്രതികരിച്ചു. ഇജാസിന്റെ പേരോടെ പങ്കുവച്ച സ്‌ക്രീന്‍ഷോട്ട് വ്യാജമാണെന്നും ഇതിനെതിരെ നടപടി എടുക്കണമെന്ന് ആവശ്യപ്പെട്ടാണ് ഇജാസ് അസ്ലാം പരാതി നല്‍കിയത്.