അക്രമികള്‍ ഹരിദാസന്റെ കാല്‍ വെട്ടിയെറിഞ്ഞു; കണ്ടെത്തിയത് പൊലീസ്: നടുക്കം മാറാതെ നാട്

തലശ്ശേരി പുന്നോലിലെ വീട്ടുമുറ്റത്ത് പുലര്‍ച്ചെ ഒന്നരയ്ക്കാണ് അക്രമിസംഘം ഹരിദാസന്റെ ജീവനെടുത്തത്. സംഘത്തില്‍ ഉണ്ടായിരുന്ന ആര്‍എസ്എസ് -ബിജെപി പ്രവര്‍ത്തകരെ കണ്ടാലറിയാമെന്നു സംഭവത്തിനു ദൃക്‌സാക്ഷിയായ സഹോദരന്‍ സുരേന്ദ്രന്‍ മനോരമ ന്യൂസിനോട് പറഞ്ഞു. അക്രമികള്‍ വെട്ടിയെറിഞ്ഞ ഹരിദാസിന്റെ കാല്‍ പിന്നീട് പൊലീസാണ് കണ്ടെത്തിയത്. ബഹളം കേട്ട് ഉറക്കമെണീറ്റ സഹോദരങ്ങള്‍ കാണുന്നത് ചോരയില്‍ കുളിച്ചു കിടക്കുന്ന ഹരിദാസിനെയാണ്. സഹോദരങ്ങള്‍ക്ക് നേരെ ആയുധം വീശിയാണ് അക്രമികള്‍ രക്ഷപ്പെട്ടത്. കഴിഞ്ഞ എട്ടാം തീയതി പ്രദേശത്തെ ക്ഷേത്രത്തിലെ ഉത്സവത്തിനിടെ ആര്‍എസ്എസ്- ബിജെപി പ്രവര്‍ത്തകരുമായി ഉണ്ടായ തര്‍ക്കമാണ് കൊലപാതകത്തിലേക്ക് എത്തിയതെന്ന് സഹോദരന്‍ പറഞ്ഞു. ക്ഷേത്രത്തിലുണ്ടായ സംഘര്‍ഷത്തിന് പിന്നാലെ, ബിജെപി കൗണ്‍സിലര്‍ വിജേഷ് സിപിഎമ്മുകാരെ ഭീഷണിപ്പെടുത്തി പ്രതിഷേധ യോഗത്തില്‍ പ്രസംഗിച്ചിരുന്നു. ഭാര്യയും രണ്ട് പെണ്‍മക്കളും അമ്മയും അടങ്ങുന്ന കുടുംബത്തിന്റെ ആശ്രയമായിരുന്നു ഹരിദാസെന്നു നാട്ടുകാര്‍ പറഞ്ഞു.