പിടിച്ചെടുത്തത് രണ്ടരകോടിയുടെ തിമിംഗല ഛര്‍ദി; കിട്ടാവുന്നത് 7 വര്‍ഷം വരെ തടവ്

കോഴിക്കോട്: നഗരത്തില്‍ നിന്ന് കഴിഞ്ഞദിവസം പിടിച്ചെടുത്ത തിമിംഗല ദഹനാവശിഷ്ടത്തിന് വിപണിയില്‍ രണ്ടര കോടി രൂപ വിലവരുമെന്ന് വനംവകുപ്പ്. കോഴിക്കോട് കൊടുവള്ളി സ്വദേശികളായ രണ്ട് യുവാക്കളെയും ഇവര്‍ സഞ്ചരിച്ചിരുന്ന കാറും വനംവകുപ്പ് കസ്റ്റഡിയിലെടുത്തിരുന്നു. വെള്ളിമാട് കുന്ന് എന്‍ജിഒ ക്വാര്‍ട്ടേഴ്‌സിന് സമീപത്ത് കാറിലെത്തിയ രണ്ട് യുവാക്കാള്‍ തിമിംഗല ഛര്‍ദി വില്‍ക്കുന്നുണ്ടെന്ന രഹസ്യ വിവരത്തെ തുടര്‍ന്നായിരുന്നു വനം വകുപ്പിന്റ പരിശോധന. ഇന്തൊനീഷ്യയില്‍ നിന്ന് എത്തിച്ച തിമിംഗല ഛര്‍ദി കിലോയ്ക്ക് 55 ലക്ഷം രൂപ നിരക്കില്‍ വില്‍ക്കുകയായിരുന്നു ലക്ഷ്യം. കൊടുവള്ളി സ്വദേശികളായ അജ്മല്‍, സഹല്‍ എന്നിവരാണ് പിടിയിലായത്. സുഗന്ധ വ്യഞ്ജനങ്ങള്‍ നിര്‍മിക്കുന്നവരാണ് വാങ്ങാനെത്തിയതെന്നും യുവാക്കള്‍ പറഞ്ഞു. ഏഴുവര്‍ഷം വരെ തടവ് ശിക്ഷ ലഭിക്കാവുന്ന കുറ്റമാണിത്. പിടിയിലായവര്‍ മുമ്പ് സമാനമായ കേസില്‍ ഉള്‍പ്പെട്ടതായി അറിവില്ലെന്ന് ഉദ്യോഗസ്ഥര്‍ പറഞ്ഞു. താമരശേരി ഡിവിഷനിലെ ഉദ്യോഗസ്ഥരും ഫോറസ്റ്റ് ഫ്‌ലൈയിങ് സ്‌ക്വാഡും ചേര്‍ന്നാണ് പ്രതികളെ പിടികൂടിയത്.