അഭിഭാഷകരുടെ പ്രതിഷേധം ; രാമന്‍പിള്ളയുടെ മൊഴിയെടുക്കുന്നത് ക്രൈംബ്രാഞ്ച് നീട്ടിവെച്ചു

കൊച്ചി: നടിയെ ആക്രമിച്ച കേസിലെ പ്രതി നടന്‍ ദിലീപിന്റെ അഭിഭാഷകന്‍ ബി. രാമന്‍പിള്ളയുടെ മൊഴിയെടുക്കാനുള്ള ക്രൈംബ്രാഞ്ച് നീക്കം വിവാദമായി. ഇതേത്തുടര്‍ന്ന് മൊഴിയെടുക്കല്‍ നീട്ടിവെച്ചതായി ക്രൈംബ്രാഞ്ച് രാമന്‍പിള്ളയെ അറിയിച്ചു. കേസില്‍ സാക്ഷിയായ ജിന്‍സണ്‍ എന്നയാളുടെ പരാതിയുടെ അടിസ്ഥാനത്തില്‍ പീച്ചി പോലീസ് രജിസ്റ്റര്‍ ചെയ്ത കേസിലാണ് ക്രൈംബ്രാഞ്ച് രാമന്‍പിള്ളയുടെ മൊഴി ആവശ്യപ്പെട്ട് നോട്ടീസ് നല്‍കിയത്. തെറ്റായി രജിസ്റ്റര്‍ചെയ്ത കേസില്‍ തന്റെ മൊഴി രേഖപ്പെടുത്തുന്നത് നിയമവാഴ്ചയോടുള്ള വെല്ലുവിളിയാണെന്നു ചൂണ്ടിക്കാട്ടി നേരത്തേ രാമന്‍പിള്ള ക്രൈംബ്രാഞ്ചിനു മറുപടി നല്‍കിയിരുന്നു. ഫെബ്രുവരി 16-ന് രാമന്‍പിള്ളയുടെ ഓഫീസിലോ വീട്ടിലോ എത്തി മൊഴി രേഖപ്പെടുത്താന്‍ സൗകര്യപ്പെടുത്തണമെന്നാണ് ക്രൈംബ്രാഞ്ച് ആവശ്യപ്പെട്ടിരുന്നത്. ഇതിനെതിരേ അഭിഭാഷകരുടെ ഭാഗത്തുനിന്നും നിയമലോകത്തുനിന്നും വ്യാപക എതിര്‍പ്പുയര്‍ന്നു.പ്രതിക്കായി ഹാജരാകുന്ന അഭിഭാഷകന്റെ മൊഴിയെടുക്കാനുള്ള ശ്രമം ഇന്ത്യന്‍ തെളിവ് നിയമത്തിന്റെ ലംഘനമാണെന്നാണ് ഇവരെല്ലാം ചൂണ്ടിക്കാണിച്ചത്. നടിയെ ആക്രമിച്ച കേസിലെ പ്രതി പള്‍സര്‍ സുനിയുടെ സഹതടവുകാരനായിരുന്ന ജിന്‍സണെ മറ്റൊരു സഹതടവുകാരനായ നാസര്‍ മുഖേന അഭിഭാഷകന്‍ സ്വാധീനിക്കാന്‍ ശ്രമിച്ചെന്നായിരുന്നു പരാതി. ചൊവ്വാഴ്ച ഹൈക്കോടതി അഭിഭാഷക അസോസിയേഷന്റെ നേതൃത്വത്തില്‍ കോടതിയങ്കണത്തില്‍ പ്രതിഷേധപ്രകടനം നടത്തി. രാമന്‍പിള്ളയ്ക്ക് നോട്ടീസ് നല്‍കിയ നടപടി അഭിഭാഷകരുടെ സ്വതന്ത്ര പ്രവര്‍ത്തനം തടസ്സപ്പെടുത്തുന്നതാണെന്ന് കേരള ബാര്‍ കൗണ്‍സില്‍ പറഞ്ഞു.വിഷയം അടുത്ത കൗണ്‍സില്‍ യോഗത്തില്‍ ചര്‍ച്ചചെയ്യുമെന്നും കേരള ബാര്‍ കൗണ്‍സില്‍ പറഞ്ഞു.