വിദ്യാര്‍ഥികളെന്ന പേരില്‍ വീടെടുത്ത് ലഹരിവില്‍പന; യുവതി ഉള്‍പ്പെടെ 5 പേര്‍ അറസ്റ്റില്‍

വിദ്യാര്‍ഥികളെന്ന പേരില്‍ വീടെടുത്തു സ്‌കൂള്‍, കോളജ് വിദ്യാര്‍ഥികള്‍ക്കിടയില്‍ ലഹരി വില്‍പന നടത്തി വന്ന യുവതി ഉള്‍പ്പെടുന്ന അഞ്ചംഗ സംഘം പൊലീസിന്റെ പിടിയില്‍. ഇടപ്പള്ളി പോണേക്കര റൈ-റാസ് അപാര്‍ട്‌മെന്റില്‍ താമസിക്കുന്ന വൈഷ്ണവി സുരേഷാണ് സംഘത്തിലെ വനിത. മലപ്പുറം പുറങ്ങ് അന്തിപ്പാട്ടില്‍ മുസമ്മില്‍(22), കൊല്ലം അയലറ, സൗപര്‍ണിക വീട്ടില്‍ സനുരാജ്(24), കോതമംഗലം വടാട്ടുപാറ പുത്തന്‍പുരയ്ക്കല്‍ അനന്തു എസ്. നായര്‍(23), വയനാട് വൈത്തിരി ഇലയടത്തു വീട്ടില്‍ അഭിഷേക്(22) എന്നിവരാണു മറ്റു പ്രതികള്‍. ബെംഗളുരുവില്‍ നിന്നു കുറഞ്ഞ വിലയ്ക്കു വാങ്ങുന്ന എംഡിഎംഎ ഇനത്തില്‍ പെട്ട ലഹരി കൊച്ചിയിലെത്തിച്ച് ഗ്രാമിന് 3500 രൂപയ്ക്കു വില്‍പന നടത്തി വരികയായിരുന്നു. 20 ഗ്രാം ലഹരി ഇവരില്‍ നിന്നു പിടികൂടിയിട്ടുണ്ട്. സിറ്റി പൊലീസ് കമ്മിഷണര്‍ സി. നാഗരാജുവിന്റെ നിര്‍ദേശത്തില്‍ ഡാന്‍സാഫ്, കളമശേരി പൊലീസ് സംഘമാണ് പ്രതികള്‍ക്കായി വലവിരിച്ചത്. പ്രതികളില്‍ ഒരാളായ സനുരാജ് ബെംഗളുരുവില്‍ നിന്ന് എത്തിച്ച ലഹരി മുസമ്മലിനൊപ്പം ചേര്‍ന്നു സംഘത്തിലെ മറ്റുള്ളവര്‍ക്കു വില്‍ക്കുകയായിരുന്നു. മറ്റു പ്രതികള്‍ക്കൊപ്പം ചേര്‍ന്നു ലഹരി ഉപയോഗിക്കുന്നതിനിടയിലാണ് ഇവര്‍ പിടിയിലായത്. ഇവര്‍ വിദ്യാര്‍ഥികള്‍ എന്ന നിലയില്‍ വീടു വാടകയ്‌ക്കെടുത്താണു പ്രദേശത്തു താമസിച്ചിരുന്നതെന്നു കണ്ടെത്തിയിട്ടുണ്ട്.