മലങ്കര ഓര്‍ത്തഡോക്സ് സഭ ഏഴ് മെത്രാന്‍മാരെ തെരഞ്ഞെടുത്തു

കോലഞ്ചേരി: മലങ്കര ഓര്‍ത്തഡോക്സ് സുറിയാനി സഭയുടെ അസോസിയേഷനില്‍ ഏഴ് മെത്രാന്‍മാരെ തെരഞ്ഞെടുത്തു.ഫാ. വിനോദ് ജോര്‍ജ്, ഫാ. പി.സി. തോമസ്, ഫാ. റജി ഗീവര്‍ഗീസ്, ഫാ. വര്‍ഗീസ് കെ. ജോഷ്വ, കൊച്ചുപറമ്പില്‍ ഗീവര്‍ഗീസ് റമ്പാന്‍, ഫാ.എബ്രഹാം തോമസ്, ഫാ. സഖറിയാ നൈനാന്‍ എന്നിവരെയാണ് ഓണ്‍ലൈന്‍ വോട്ടിങിലൂടെ തെരഞ്ഞെടുത്തത്. ഇന്നലെ കോലഞ്ചേരി സെന്റ് പീറ്റേഴ്സ് ആന്‍ഡ് സെന്റ് പോള്‍സ് പളളി അങ്കണത്തിലെ ബസേലിയോസ് പൗലോസ് പ്രഥമന്‍ നഗറില്‍ നടന്ന പള്ളി പ്രതിപുരുക്ഷന്‍മാരുടെ യോഗത്തില്‍ ആകെയുള്ള 3973 പേരില്‍ 3907പേര്‍ രജിസ്റ്റര്‍ ചെയ്തു. ഇതില്‍ 3889 പേര്‍ വോട്ട ചെയ്തു. ഇതില്‍ തന്നെ 1259പേര്‍ വൈദീകരും 2630 പേര്‍ ആത്മായക്കാരും ആയിരുന്നു. ഇരുകൂട്ടരുടെയും 50 ശതമാനം അധികം ഒരു വോട്ട് കിട്ടിയവരാണ് വിജയിച്ചത്. പരിശുദ്ധ അദ്ധ്യക്ഷത വഹിച്ചു. ഉച്ചയ്ക്ക് കോലഞ്ചേരി പള്ളിയില്‍ ധൂപപ്രാര്‍ത്ഥയ്ക്ക് ശേഷം കാതോലിക്കാബാവയേയും മറ്റ് തിരുമേനിമാരെയും സമ്മേളന വേദിയിലേയ്ക്ക് ആനയിച്ചു. പ്രാര്‍ത്ഥനയോടെ അസോസിയേഷന്‍ നടപടികള്‍ ആരംഭിച്ചു. ഫാ.ജോസ് തോമസ് ധ്യാനപ്രസംഗം നടത്തിയതിന് പിന്നാലെ കാതോലിക്കാ ബാവ അധ്യക്ഷ പ്രസംഗം നടത്തി. തെരഞ്ഞെടുപ്പിന്റെ മുഖ്യവരണാധികാരിയായ സി.കെ. മാത്യൂ ഓണ്‍ലൈന്‍ വോട്ടിങിനെ കുറിച്ച് ബോധ്യപ്പെടുത്തി. പിന്നാലെ കാതോലിക്കാ ബാവ 2.15ഓടെ വോട്ടിങ് പ്രഖ്യാപിച്ചു. മൂന്ന് മണിക്കൂര്‍ നേരമാണ് വോട്ടിങിന് അനുവധിച്ചിരുന്നത്. 5.15ന് വോട്ടിങ് പൂര്‍ത്തിയാക്കി. കൗണ്ടിങിലേയ്ക്ക് കടന്നു. 6 മണിയോടെ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ വിജയികളെ പ്രഖ്യാപിച്ചു. കഴിഞ്ഞ ദിവസം വൈകുന്നേരം 5 മണി മുതല്‍ അംങ്ങളുടെ രജിസ്ട്രേഷന്‍ ആരംഭിച്ചു. ഇന്നലെ ഉച്ചയ്ക്ക് 12 മണിയോടുകൂടി രജിസ്ട്രേഷന്‍ സമാപിച്ചു. 11 സ്ഥാനാര്‍ഥികളായിരുന്നു ഉണ്ടായിരുന്നത്. മലങ്കര ഓര്‍ത്തഡോക്സ് സഭയുടെ 1934ലെ ഭരണഘടന നിലവില്‍ വന്നതിന് ശേഷം നടക്കുന്ന 25 -ാംമത് അസോസിയേഷനായിരുന്നു ഇന്നലെ നടന്നത്.