ചുവപ്പണിഞ്ഞ് കൊച്ചി ഒരുങ്ങി

സിപിഐ എം 23--ാം പാർടി കോൺഗ്രസിനു മുന്നോടിയായുള്ള സംസ്ഥാന സമ്മേളനത്തിന് എറണാകുളം ഒരുങ്ങി. 37 വർഷത്തിനുശേഷം തുറമുഖനഗരം ആതിഥേയത്വം വഹിക്കുന്ന സംസ്ഥാന സമ്മേളനം ചരിത്രസംഭവമാക്കാൻ എല്ലാ ഒരുക്കവും പൂർത്തിയായതായി സ്വാഗതസംഘം ചെയർമാൻ മന്ത്രി പി രാജീവും ജനറൽ കൺവീനർ സി എൻ മോഹനനും വാർത്താസമ്മേളനത്തിൽ പറഞ്ഞു. മാർച്ച് ഒന്നുമുതൽ നാലുവരെ മറൈൻഡ്രൈവിലാണ് സമ്മേളനം ചേരുന്നത്. ചൊവ്വ രാവിലെ ഒമ്പതിന് സമ്മേളനഗറിൽ ചെങ്കൊടി ഉയർത്തും. തുടർന്ന് പ്രതിനിധി സമ്മേളനം പാർടി ജനറൽ സെക്രട്ടറി സീതാറാം യെച്ചൂരിയും സമാപനദിവസം പൊതുസമ്മേളനം മുഖ്യമന്ത്രി പിണറായി വിജയനും ഉദ്ഘാടനം ചെയ്യും. രണ്ടാംദിവസം 'ഭരണഘടന, ഫെഡറലിസം, മതനിരപേക്ഷത, ഇന്ത്യൻ ജനാധിപത്യത്തിന്റെ ഭാവി' വിഷയത്തിൽ സെമിനാർ പൊളിറ്റ്ബ്യൂറോ അംഗം പ്രകാശ് കാരാട്ടും മൂന്നാംദിവസം സാംസ്‌കാരിക സംഗമം പൊളിറ്റ്ബ്യൂറോ അംഗം എം എ ബേബിയും ഉദ്ഘാടനം ചെയ്യും. പൊളിറ്റ്ബ്യൂറോ അംഗങ്ങളായ എസ് രാമചന്ദ്രൻപിള്ള, ബൃന്ദ കാരാട്ട്, ജി രാമകൃഷ്ണൻ എന്നിവരും സമ്മേളനത്തിൽ പങ്കെടുക്കും. ചെങ്കൊട്ടയുടെ മാതൃകയിലാണ് സമ്മേളനനഗർ ഒരുക്കിയിട്ടുള്ളത്. നാനൂറോളം പേർക്ക് സാമൂഹ്യ അകലം പാലിച്ച് പങ്കെടുക്കാവുന്നവിധമാണ് പ്രതിനിധി സമ്മേളനം നടക്കുന്ന ബി രാഘവൻനഗർ നിർമിച്ചത്. പൊതുസമ്മേളനം നടക്കുന്ന ഇ ബാലാനന്ദൻ നഗറിൽ 1500 പേർക്ക് ഇരിക്കാം. സെമിനാറും കലാപരിപാടികളും ചരിത്രപ്രദർശനവും അഭിമന്യു നഗറിലാണ്. അവസാന റൗണ്ട് ഒരുക്കങ്ങൾ വിലയിരുത്താൻ പാർടി സംസ്ഥാന സെക്രട്ടറി കോടിയേരി ബാലകൃഷ്ണൻ ഞായറാഴ്ച എറണാകുളത്ത് എത്തും. പാർടി കേന്ദ്ര കമ്മിറ്റി അംഗം എം സി ജോസഫൈൻ, സ്വാഗതസംഘം രക്ഷാധികാരി പ്രൊഫ. എം കെ സാനു, സംസ്ഥാന കമ്മിറ്റി അംഗങ്ങളായ ഗോപി കോട്ടമുറിക്കൽ, എസ് ശർമ, കെ ചന്ദ്രൻപിള്ള, എം സ്വരാജ് എന്നിവരും വാർത്താസമ്മേളനത്തിൽ പങ്കെടുത്തു.