തിരുവനന്തപുരത്ത് വന്‍ തീപിടിത്തം; അഞ്ച് നിലകളുള്ള കെട്ടിടം പൂര്‍ണമായും കത്തി നശിച്ചു, കോടികളുടെ നഷ്ടം

തിരുവനന്തപുരം: തിരുവനന്തപുരം വെമ്പായത്ത് വന്‍ തീപിടിത്തം. വെമ്പായത്തുള്ള എ.എന്‍ ഹാര്‍ഡ്വെയര്‍ ആന്‍ഡ് പ്ലംബിംഗ് സാനിറ്ററി ഇലക്ട്രിക്കല്‍സ് കടയിലാണ് തീപിടിത്തമുണ്ടായത്. അഞ്ച് നിലകളുള്ള കെട്ടിടം പൂര്‍ണമായും കത്തി നശിച്ചതായാണ് വിവരം. വെല്‍ഡിങ് മെഷീനില്‍ നിന്നും ടിന്നറിലേക്ക് തീപ്പൊരി പടര്‍ന്ന് തീപ്പിടിച്ചതാകാമെന്നാണ് പ്രാഥമിക നിഗമനം. ആളുകള്‍ ആരും അകത്തില്ല. സമീപത്തുള്ള കെട്ടിടത്തിലേക്ക് തീ പടരാതിരിക്കാന്‍ വേണ്ടി ഫയര്‍ഫോഴ്‌സും നാട്ടുകാരും ശ്രമിച്ചു കൊണ്ടിരിക്കുകയാണ്. അഞ്ചോളം ഫയര്‍ഫോഴ്‌സ് സ്ഥലത്തെത്തി തീയണക്കാനുള്ള ശ്രമങ്ങള്‍ തുടരുകയാണ്. കടയുടെ ഉദ്ഘാടനം കഴിഞ്ഞ് ഒരു വര്‍ഷത്തില്‍ താഴെ മാത്രമേ ആയിട്ടുള്ളൂ. ഓരോ നിലകളിലായിട്ടായിരുന്നു സാധനങ്ങള്‍ ക്രമീകരിച്ചിരിക്കുന്നത്. കോടികളുടെ സാധനങ്ങള്‍ കടയില്‍ ഉണ്ടായിരുന്നതായാണ് വിവരം. പെയിന്റ് ഉത്പന്നങ്ങളാണ് കൂടുതലും ഉള്ളത് കൊണ്ട് തന്നെ തീ ആളിപ്പടരുകയാണ്.