നവകേരള നയരേഖ സി പി എം സംസ്ഥാന സമ്മേളനം ചർച്ച ചെയ്യും

നവകേരള നയരേഖ സി പി എം സംസ്ഥാന സമ്മേളനം ചർച്ച ചെയ്യും. മുഖ്യമന്ത്രി പിണറായി വിജയനാണ് ഭാവികേരളത്തിൻ്റെ വികസനം സംബന്ധിച്ച വിശദമായ നയരേഖ പ്രതിനിധി സമ്മേളത്തിൽ അവതരിപ്പിക്കുന്നത്. പാർട്ടിയുടെ ഐക്യവും വളർച്ചയും വിളംബരം ചെയ്യുന്ന ചരിത്രപരമായ സമ്മേളനമായി എറണാകുളം സമ്മേളനം മാറുമെന്നും കോടിയേരി പറഞ്ഞു . സമ്മേളന നഗരിയിലെ അവസാന വട്ട ഒരുക്കങ്ങൾ വിലയിരുത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. മാർച്ച് ഒന്നിന് രാവിലെ 9. 30 ന് പ്രതിനിധി സമ്മേളന നഗരിയായ ബി രാഘവൻ നഗറിൽ പതാക ഉയരും. . തുടർന്ന് നടക്കുന്ന പ്രതിനിധി സമ്മേളനം ജനറൽ സെക്രട്ടറി സീതാറാം യെച്ചൂരി ഉദ്ഘാടനം ചെയ്യും. നിലവിലുള്ള സംസ്ഥാന കമ്മറ്റി അംഗങ്ങൾ 400 സംസ്ഥാന സമ്മേളന പ്രതിനിധികൾ 23 നിരീക്ഷകർ എന്നിവർ പ്രതിനിധി സമ്മേളനത്തിൽ പങ്കെടുക്കും. പി ബി അംഗങ്ങളായ പ്രകാശ് കാരാട്ട് എസ് രാമചന്ദ്രൻപിള്ള, പിണറായി വിജയൻ, കോടിയേരി ബാലകൃഷ്ണൻ, വൃന്ദാകാരാട്ട് , എം എ ബേബി, ജി രാമകൃഷ്ണൻ എന്നിവരും പങ്കെടുക്കും . പ്രവർത്തന റിപ്പോർട്ടിന് പുറമെ നവകേരള സൃഷ്ടി സംബന്ധിച്ച നയരേഖയും സമ്മേളനം ചർച്ച ചെയ്യും . സമ്മേളനത്തിൻ്റെ ആദ്യ ദിനം വൈകിട്ട് 4ന് മുഖ്യമന്ത്രി പിണറായി വിജയൻ നയരേഖ അവതരിപ്പിക്കും. പാർടിയുടെ ഐക്യവും വളർച്ചയും വിളംബരം ചെയ്യുന്ന ചരിത്രപരമായ സമ്മേളനമായി എറണാകുളം സമ്മേളനം മാറുമെന്നും കോടിയേരി പറഞ്ഞു. 75 വയസ്സുകഴിഞ്ഞവർ കമ്മറ്റികളിൽ നിന്നും ഒഴിവാകുമെങ്കിലും തുടർന്നും അത്തരം മുതിർന്ന നേതാക്കളുടെ സേവനം പാർട്ടി പ്രയോജനപ്പെടുത്തുമെന്ന് കോടിയേരി പറഞ്ഞു. മാർച്ച് നാലിന് വൈകുന്നേരം അഞ്ചിന് മറൈൻ ഡ്രൈവിലെ ഇ ബാലാനന്ദൻ നഗറിൽ നടക്കുന്ന പൊതുസമ്മേളനം മുഖ്യമന്ത്രിയും പോളിറ്റ്ബ്യൂറോ അംഗവുമായ പിണറായി വിജയൻ ഉദ്ഘാടനം ചെയ്യും. കോവിഡ് മാനദണ്ഡങ്ങൾ പൂർണമായും പാലിച്ചാണ് സമ്മേളനം സംഘടിപ്പിക്കുന്നത് സമ്മേളനത്തിൻ്റെ ഭാഗമായി സെമിനാറുകളും കലാപരിപാടികളും ഒരുക്കിയിട്ടുണ്ട്.