ഹരിദാസിനെ വധിച്ച അക്രമി സംഘത്തിലെ രണ്ട് പേരടക്കം ആറ് ബിജെപി പ്രവര്‍ത്തകര്‍ പിടിയില്‍

കണ്ണൂര്‍: ന്യൂ മാഹിയില്‍ സിപിഎം പ്രവര്‍ത്തകന്‍ ഹരിദാസിന്റെ കൊലപാതകത്തില്‍ നേരിട്ട് പങ്കെടുത്തവരടക്കം ആറ് ബിജെപി പ്രവര്‍ത്തകര്‍ പിടിയില്‍. കൊലപാതകം നടത്തിയ സംഘത്തിലെ രണ്ട് പേരെയും ഗൂഢാലോചന കുറ്റം ചുമത്തി 4 പേരെയുമാണ് അറസ്റ്റ് ചെയ്തത്. പ്രതികളെ മുഴുവന്‍ തിരിച്ചറിഞ്ഞെന്നും കൂടുതല്‍ അറസ്റ്റ് വരും ദിവസങ്ങളിലുണ്ടാകുമെന്നും കണ്ണൂര്‍ സിറ്റി പൊലീസ് കമ്മീഷണര്‍ ആര്‍ ഇളങ്കോ പറഞ്ഞു. കൊലപാതകം നടന്ന് പത്ത് ദിവസം പിന്നിടുമ്പോഴും കൃത്യം നടത്തിയ ആളുകളെ അറസ്റ്റ് ചെയ്യാനായില്ലെന്ന വിമര്‍ശനങ്ങള്‍ക്കിടെയാണ് കൊലപാതകത്തില്‍ നേരിട്ട് പങ്കെടുത്തവര്‍ അടക്കം ആറുപേര്‍ പിടിയിലാകുന്നത്. കൃത്യത്തില്‍ നേരിട്ട് പങ്കെടുത്ത കുറ്റത്തിന് ക്രിമിനല്‍ പശ്ചാത്തലമുള്ള ബിജെപി പ്രവര്‍ത്തകരായ പ്രജോഷ്, കൊച്ചറ ദിനേശന്‍ എന്നിവരെയാണ് അറസ്റ്റ് ചെയ്തത്. 21 ന് പുലര്‍ച്ചെ നടന്ന കൊലപാതകത്തിന് മുന്‍പ് മൂന്ന് തവണ ഹരിദാസിനെ വധിക്കാനുള്ള ശ്രമങ്ങളുണ്ടായെന്നും പൊലീസ് പറയുന്നു. ഈ ഗൂഢാലോചനയില്‍ ഉള്‍പെട്ട സികെ അര്‍ജ്ജുന്‍, കെ അഭിമന്യു, സികെ അശ്വന്ത്, ദീപക് സദാനന്ദന്‍ എന്നിവരുടെയും അറസ്റ്റ് രേഖപ്പെടുത്തി. ഫെബ്രുവരി എട്ടിന് പുന്നോല്‍ മൂത്ത കൂലോത്ത് ഭഗവതി ക്ഷേത്രത്തില്‍ വെച്ച് ബിജെപി പ്രവര്‍ത്തകരെ ഹരിദാസും സംഘവും മര്‍ദ്ദിച്ചതിന്റെ പക വീട്ടാനായിരുന്നു ബിജെപി പ്രവര്‍ത്തകരുടെ പദ്ധതി. നഗരസഭ കൗണ്‍സിലറും ബിജെപി തലശ്ശേരി മണ്ഡലം പ്രസിഡന്റുമായ കെ ലിജേഷാണ് കൊലപാതകത്തിന്റെ മുഖ്യ ആസൂത്രകനെന്ന് പൊലീസ് പറയുന്നു. ഇയാള്‍ അടക്കം നാലുപേര്‍ കൃത്യം നടന്നതിന് പിറ്റേന്ന് തന്നെ പിടിയിലായിരുന്നു. ലിജേഷ് ഉള്‍പടെയുള്ള നേതാക്കളെ കള്ളക്കേസില്‍ കുടുക്കുകയാണെന്നാരോപിച്ച് പൊലീസിനെതിരെ ബിജെപി പ്രതിഷേധം കടുപ്പിക്കുന്നുണ്ട്.