ചുട്ടുപൊള്ളി പാലക്കാട് ജില്ല

മാര്‍ച്ച് തുടങ്ങിയപ്പോഴേക്കും പാലക്കാട് ജില്ല പൊള്ളിത്തുടങ്ങി. നാല്‍പത് ഡിഗ്രി സെല്‍ഷ്യസ് ആണ് കഴിഞ്ഞ ദിവസങ്ങളില്‍ രേഖപ്പെടുത്തിയ താപനില. ഇടമഴ ഉണ്ടായില്ലെങ്കില്‍ ഇനിയുള്ള മാസങ്ങള്‍ താപനില ഏതുവിധമാകുമെന്നാണ് കണ്ടറിയേണ്ടത്. ചൂടുകനക്കുന്ന സാഹചര്യത്തില്‍ തൊഴില്‍സമയം ക്രമീകരിക്കണമെന്ന നിര്‍ദേശം അധികൃതര്‍ നല്‍കിയിട്ടുണ്ട്. മാര്‍ച്ച് എത്തിയപ്പോഴേക്കും ചൂട് നാല്‍പത് ഡിഗ്രി സെല്‍ഷ്യസ് കടന്നിരിക്കുകയാണ് പാലക്കാട്. മുണ്ടൂര്‍ ഐആര്‍ടിസിയില്‍ കഴിഞ്ഞ ദിവസങ്ങളില്‍ രേഖപ്പെടുത്തിയ താപനിലയാണിത്. കഴിഞ്ഞ വര്‍ഷത്തിലേതിന് സമാനമാണ് താപനില. കഴിഞ്ഞ വര്‍ഷം മാര്‍ച്ച് അവസാനത്തോടെ ഇടമഴ പെയ്തതിനെ തുടര്‍ന്ന് നാല്‍പ്പത്തിരണ്ട് ഡിഗ്രി സെല്‍ഷ്യസിലെത്തിയ താപ നിലയില്‍ നേരിയ കുറവുണ്ടായിരുന്നു. ഇത്തവണയും പ്രതീക്ഷ ഇടമഴയിലാണ്. ജില്ലയിലെ ജലാശയങ്ങളിലെല്ലാം ഇപ്പോള്‍ തന്നെ വരള്‍ച്ച പ്രകടമായി തുടങ്ങി. ഭാരതപ്പുഴയടക്കമുള്ള പ്രധാന നദികളിലെല്ലാം ചെറു തടയിണകളോട് ചേര്‍ന്നുള്ള ഇടങ്ങളില്‍ മാത്രമാണ് വെള്ളമുള്ളത്. ചിലയിടങ്ങളിലെല്ലാം നീരൊഴുക്ക് നിലച്ചിട്ടുണ്ട്. ചൂടിനൊപ്പം പാലക്കാട് ആശങ്കയുമേറുന്നുണ്ട്. ചൂട് കനക്കുന്ന സാഹചര്യത്തില്‍ പുറത്ത് ജോലിചെയ്യുന്നവരുടെ തൊഴില്‍സമയം ക്രമീകരിച്ചതായാണ് ജില്ലാ ലേബര്‍ ഓഫീസറുടെ ഉത്തരവ്. ഏപ്രില്‍ 30 വരെ ഉച്ചയ്ക്ക് 12 മുതല്‍ വൈകീട്ട് മൂന്ന് വരെയുള്ള സമയം വിശ്രമവേളയാക്കണമെന്നാണ് നിര്‍ദേശം. തൊഴിലുടമകള്‍ ഈ നിര്‍ദേശം പാലിച്ചില്ലെങ്കില്‍ നിയമനടപടിയുണ്ടാകുമെന്നും നിര്‍ദേശമുണ്ട്.