‘കൊലപാതകത്തിനു കാരണം പ്രണയത്തെച്ചൊല്ലിയുള്ള തര്‍ക്കം’; കുറ്റം സമ്മതിച്ച് പ്രവീണ്‍

തമ്പാനൂരിലെ ഹോട്ടല്‍മുറിയില്‍ മരിച്ചനിലയില്‍ കണ്ടെത്തിയ കാട്ടാക്കട സ്വദേശിനി ഗായത്രിയുടേതു കൊലപാതകമെന്നു പൊലീസ്. പ്രണയബന്ധത്തെ ചൊല്ലിയുള്ള തര്‍ക്കമാണു കൊലപാതകത്തിനു കാരണം. ഗായത്രിയെ ശ്വാസംമുട്ടിച്ചു കൊലപ്പെടുത്തിയതാണെന്നു ഒപ്പുമുണ്ടായിരുന്ന പ്രവീണ്‍ സമ്മതിച്ചെന്നു പൊലീസ് അറിയിച്ചു. കൊലപാതകത്തിനുശേഷം കടന്നുകളഞ്ഞ പ്രവീണിനെ ഞായറാഴ്ച ഉച്ചയ്ക്കു കൊല്ലം പരവൂരില്‍ വച്ചാണ് പൊലീസ് പിടികൂടിയത്. ഗായത്രിയും പ്രവീണും ശനിയാഴ്ച ഉച്ചയ്ക്കാണു ഹോട്ടലില്‍ മുറിയെടുത്തത്. വൈകിട്ട് പ്രവീണ്‍ മുറിയില്‍നിന്നു പുറത്തുപോയി. ആ സമയം മുറി പുറത്തുനിന്നു പൂട്ടിയ നിലയിലായിരുന്നു. രാത്രിയോടെ യുവതി മുറിയിലുണ്ടെന്നു പറഞ്ഞു ഹോട്ടലിലേക്ക് ഒരു ഫോണ്‍ സന്ദേശം വന്നു. തുടര്‍ന്ന് ഹോട്ടല്‍ അധികൃതര്‍ പൊലീസിനെ അറിയിക്കുകയും പൊലീസെത്തി മുറി കുത്തിത്തുറക്കുകയുമായിരുന്നു. തിരുവനന്തപുരത്തെ ആലുക്കാസ് ജ്വലറിയില്‍ ഡ്രൈവറാണ് പ്രവീണ്‍. ഇതേ സ്ഥാപനത്തില്‍ എട്ടു മാസം മുന്‍പ് ഗായത്രിയും ജോലി നോക്കിയിരുന്നു.