കാഞ്ഞിരപ്പള്ളിയില്‍ സ്വത്ത് തര്‍ക്കത്തിനിടെയുണ്ടായ വെടിവയ്പ്പ്; വെടിയേറ്റ മാത്യു സ്‌കറിയയും മരിച്ചു

കാഞ്ഞിരപ്പള്ളിയില്‍ സ്വത്ത് തര്‍ക്കത്തിനിടെയുണ്ടായ വെടിവയ്പ്പില്‍ വെടിയേറ്റ മാതൃ സഹോദരനും മരിച്ചു. കൂട്ടിക്കല്‍ സ്വദേശി മാത്യു സ്‌കറിയ ആണ് മരിച്ചത്. തലയ്ക്ക് വെടിയേറ്റ മാത്യു ഗുരുതരാവസ്ഥയിലായിരുന്നു. ഹൃദയസ്തംഭനത്തെ തുടര്‍ന്നാണ് മരണം. തിങ്കളാഴ്ച വൈകിട്ട് 5 മണിയോടെയാണ് കാഞ്ഞിരപ്പള്ളി കരിമ്പാനായില്‍ ജോര്‍ജ് കുര്യന്‍ സഹോദരന്‍ രഞ്ജു കുര്യനെ വെടിവെച്ചു കൊലപ്പെടുത്തിത്. സഹോദരങ്ങള്‍ തമ്മിലുള്ള സ്വത്തു തര്‍ക്കമാണ് വെടിവെയ്പ്പില്‍ കലാശിച്ചത്. തര്‍ക്കത്തില്‍ മാത്യു സ്‌കറിയയ്ക്കും വെടിയേറ്റിരുന്നു. അതേസമയം, കഞ്ഞിരപ്പള്ളിയില്‍ സഹോദരനെ വെടിവെച്ചു കൊന്ന സംഭവം ആസൂത്രിതമെന്ന് പൊലീസ്. സ്വത്തിന്റെ പേരില്‍ രണ്ട് ദിവസങ്ങളായി സഹോദരങ്ങള്‍ തമ്മില്‍ തര്‍ക്കം നടന്നിരുന്നു. മൂന്നാം ദിനം പ്രതി ജോര്‍ജ് കുര്യന്‍ കയ്യില്‍ തോക്ക് കരുതിയത് മുന്‍കൂട്ടി നിശ്ചയിച്ച പ്രകാരമായിരുന്നുവെന്നു പൊലീസ് പറയുന്നു. ജോര്‍ജ് കുര്യനെ ഇന്ന് തെളിവെടുപ്പിന് ശേഷം കോടതിയില്‍ ഹാജരാക്കും.