തിരുവനന്തപുരത്ത് ഗുണ്ടയെ പിടികൂടുന്നതിനിടെ 4 പൊലീസുകാര്‍ക്ക് കുത്തേറ്റു

കല്ലമ്പലം സ്റ്റേഷനിലെ നാല് പൊലീസുകാര്‍ക്ക് കുത്തേറ്റു. ലഹരിമരുന്ന് കേസിലെ പ്രതിയായ അനസിനെ പിടികൂടുന്നതിനിടെ പാരിപ്പള്ളിയില്‍വച്ചായിരുന്നു ആക്രമണം. എസ്‌ഐ ശ്രീജിത്ത്, പൊലീസുകാരായ ചന്തു, വിനോദ്, ജയന്‍ എന്നിവര്‍ക്കാണു കുത്തേറ്റത്. കല്ലമ്പലം സ്റ്റേഷനില്‍ 2018ല്‍ റജിസ്റ്റര്‍ ചെയ്ത എക്‌സ്‌പ്ലോസീവ് കേസിലെ പ്രതിയാണ് അനസ് ജാന്‍ (30). ശ്രീജിത്തിനു വാരിയെല്ലിന്റെ പിന്‍ഭാഗത്തും വിനോദിന് വലതു തോളിനും ചന്തുവിനു കാല്‍മുട്ടിലുമാണു പരുക്ക്. വിനോദിനെ പാരിപ്പള്ളി മെഡിക്കല്‍ കോളജ് ആശുപത്രിയിലും ശ്രീജിത്ത്, ചന്തു, ജയന്‍ എന്നിവരെ തിരുവനന്തപുരത്തെ സ്വകാര്യ ആശുപത്രിയിലും പ്രവേശിപ്പിച്ചു. ചികിത്സയില്‍ കഴിയുന്ന പൊലീസ് ഉദ്യോഗസ്ഥരെ റൂറല്‍ എസ്പി ദിവ്യ വി.ഗോപിനാഥ്, റേഞ്ച് ഡിഐജി നിശാന്തിനി, വര്‍ക്കല ഡിവൈഎസ്പി നിയാസ് എന്നിവര്‍ സന്ദര്‍ശിച്ചു സ്ഥിതിഗതികള്‍ വിലയിരുത്തി. അനസിനെ അറസ്റ്റ് ചെയ്‌തെന്നു പൊലീസ് അറിയിച്ചു. ഇയാളെ ബുധനാഴ്ച കോടതിയില്‍ ഹാജരാക്കും. പ്രതിക്കെതിരെ ഗുണ്ടാ ആക്ട് പ്രകാരമുള്ള നടപടികള്‍ സ്വീകരിക്കും.