ഇടുക്കിയില്‍ പെണ്‍കുട്ടിയെ പീഡിപ്പിച്ച കേസ്: കൂടുതല്‍ പേരെ ചോദ്യം ചെയ്യും

ഇടുക്കിയില്‍ പ്രായപൂര്‍ത്തിയാകാത്ത കാഴ്ച്ച പരിമിതിയുള്ള പെണ്‍കുട്ടിയെ സ്‌കൂള്‍ ജീവനക്കാരന്‍ പീഡിപ്പിച്ചെന്ന കേസ് ഒത്തുതീര്‍പ്പാക്കിയെന്ന പരാതിയില്‍ കൂടുതല്‍ പേരെ ചോദ്യം ചെയ്യും. പീഡന വിവരം പൊലീസില്‍ അറിയിക്കാതെ ഒതുക്കി തീര്‍ക്കാന്‍ ശ്രമിച്ച സ്‌കൂള്‍ അധികൃതരുടെയും പണം വാങ്ങി പ്രതിക്ക് കൂട്ടുനിന്ന പെണ്‍കുട്ടിയുടെ സുഹൃത്തിന്റെയും മൊഴിയെടുക്കാനാണ് കാഞ്ഞാര്‍ പൊലീസിന്റെ തീരുമാനം. ജനുവരി 26 റിപ്പബ്ലിക്ക് ദിനത്തില്‍ പെണ്‍കുട്ടിയുടെ കുടുംബത്തെ സ്‌കൂളില്‍ വിളിച്ചുവരുത്തി സ്‌കൂള്‍ മാനേജരുടെ നേതൃത്വത്തില്‍ കേസ് ഒതുക്കിയെന്നാണ് പരാതി. തെളിവുകള്‍ നശിപ്പിക്കണമെന്ന് പ്രതി രാജേഷ് പെണ്‍കുട്ടിയുടെ സഹോദരനോട് ആവശ്യപ്പെടുന്ന ശബ്ദരേഖ പുറത്തുവന്നിരുന്നു. ഇതിനു പിന്നാലെ പൊലീസ് പ്രതിയെ അറസ്റ്റു ചെയ്തു. തുടര്‍ന്ന് ചോദ്യം ചെയ്തശേഷം രാത്രിയോടെ കോടതിയില്‍ ഹാജരാക്കി റിമാന്‍ഡ് ചെയ്തു. പണം വാങ്ങി കേസ് ഒതുക്കാന്‍ ശ്രമിച്ച പെണ്‍കുട്ടിയുടെ സുഹൃത്തിനെയും ചോദ്യം ചെയ്യും. പെണ്‍കുട്ടിക്ക് വിദഗ്ധമായ കൗണ്‍സിലിങ് ലഭ്യമാക്കാനാണ് പൊലീസിന്റെ തീരുമാനം.