വിവാഹം ആറു മാസം മുന്‍പ്; തൃശൂരില്‍ യുവതി തീ കൊളുത്തി മരിച്ച നിലയില്‍

തൃശൂര്‍ കൊടകര മറ്റത്തൂര്‍ നീരാട്ടുകുഴിയില്‍ വിവാഹിതയായ യുവതിയെ മണ്ണെണ്ണ ഒഴിച്ച് തീകൊളുത്തി മരിച്ചനിലയില്‍ കണ്ടെത്തി. നീരാട്ടുകുഴി നാരായണമംഗലത്ത് പ്രദീപിന്റെ മകള്‍ സാന്ദ്ര (20) ആണു മരിച്ചത്. വിവാഹം കഴിഞ്ഞിട്ട് ആറുമാസമേ ആയിട്ടുള്ളൂ. ഭര്‍ത്താവ് വിപിന്‍ ടൂറിസ്റ്റ് ബസ് ഡ്രൈവറാണ്. കാലിന് അപകടം സംഭവിച്ച വിപിന്‍ വിശ്രമത്തിലാണ്. പെണ്‍കുട്ടിയുടെ വീട്ടില്‍ ആരുമില്ലാത്ത സമയത്താണ് സംഭവമെന്ന് പൊലീസ് പറഞ്ഞു. വീടിന്റെ മുന്‍വശത്തെയും പിന്‍വശത്തെയും വാതില്‍ അടച്ച ശേഷം അടുക്കളയില്‍വച്ചാണ് മണ്ണെണ്ണ ഒഴിച്ച് തീകൊളുത്തിയത്. സമീപത്തുണ്ടായിരുന്ന ഗ്യാസ് കുറ്റിയില്‍ തീ പടരാതിരുന്നതിനാല്‍ വന്‍ ദുരന്തം ഒഴിവായതായി പൊലീസ് പറഞ്ഞു. വിരലടയാള വിദഗ്ദരും സ്ഥലത്തെത്തി പരിശോധന നടത്തി. സാന്ദ്രയുടെ അച്ഛന്‍ പ്രദീപ് വിദേശത്താണ്. അമ്മ: ബിന്ദു.