സായ് ശങ്കറിന്റെ സാമ്പത്തിക ഇടപാട് പരിശോധിക്കാന്‍ ക്രൈംബ്രാഞ്ച്

നടിയെ പീഡിപ്പിച്ച കേസ് അന്വേഷിക്കുന്ന ഉദ്യോഗസ്ഥരെ വകവരുത്താന്‍ ഗൂഢാലോചന നടത്തിയെന്ന കേസിലെ തെളിവു നശിപ്പിച്ച സംഭവത്തില്‍, അന്വേഷണം നേരിടുന്ന ഐടി വിദഗ്ധന്‍ എരൂര്‍ പിഷാരികോവില്‍ ശ്രീദുര്‍ഗയില്‍ സായ്ശങ്കറിന്റെ (29) സാമ്പത്തിക ഇടപാടുകള്‍ ക്രൈംബ്രാഞ്ച് പരിശോധിക്കുന്നു. ബെംഗളൂരു, കോഴിക്കോട് എന്നിവിടങ്ങള്‍ കേന്ദ്രീകരിച്ചു നടത്തിയിരുന്ന ഐടി വ്യവസായത്തില്‍ നിക്ഷേപിക്കാന്‍ മൂന്നു വര്‍ഷം മുന്‍പു തൃശൂര്‍ സ്വദേശിയില്‍നിന്നു വാങ്ങിയ 30 ലക്ഷം രൂപ തിരികെ നല്‍കാന്‍ സായ് ശങ്കര്‍ ഒരു മാസം മുന്‍പു വാക്കാല്‍ സമ്മതിച്ചിരുന്നു. സായ്ശങ്കറിന്റെ കോഴിക്കോട്ടെ ഫ്‌ലാറ്റില്‍ നടത്തിയ റെയ്ഡില്‍ ഇതുസംബന്ധിക്കുന്ന തെളിവുകള്‍ കണ്ടെത്തി. കോവിഡ് ലോക്ഡൗണ്‍ കാലത്തു സായിയുടെ ബിസിനസ് സംരംഭം നഷ്ടത്തിലായിരുന്നു. ഇതിനിടയില്‍ തൃശൂര്‍ സ്വദേശിക്കു 30 ലക്ഷം രൂപയും ലാഭവിഹിതവും നല്‍കാന്‍ സായ്ശങ്കര്‍ സമ്മതിച്ചതിന്റെ കാരണമാണു ക്രൈംബ്രാഞ്ച് അന്വേഷിക്കുന്നത്.