കേന്ദ്രബജറ്റ്‌ കുത്തകകൾക്കുവേണ്ടി: മന്ത്രി കെ എൻ ബാലഗോപാൽ

കണ്ണൂർ സംസ്ഥാനങ്ങളെ ശ്വാസംമുട്ടിച്ച്‌ വൻകിട കുത്തകകളെ സഹായിക്കുന്ന നിലപാടാണ്‌ കേന്ദ്രസർക്കാരിന്റേതെന്ന്‌ ധനമന്ത്രി കെ എൻ ബാലഗോപാൽ പറഞ്ഞു. കണ്ണൂർ ടൗൺ സ്‌ക്വയറിൽ നടന്ന ‘കേന്ദ്ര, സംസ്ഥാന ബജറ്റുകൾ–താരതമ്യം’ സെമിനാർ ഉദ്‌ഘാടനം ചെയ്യുകയായിരുന്നു മന്ത്രി. കേന്ദ്രബജറ്റ്‌ കുത്തകൾക്കുവേണ്ടിയാണ്‌. ഭൂരിപക്ഷം ജനങ്ങളുടെയും ദുരിതം കാണുന്നില്ല. കേന്ദ്രസർക്കാർ രാജ്യത്തെ പൊതുമേഖല വിറ്റഴിച്ച്‌ സ്വകാര്യവൽക്കരണത്തെ പ്രോത്സാഹിപ്പിക്കുകയാണ്‌. സംസ്ഥാനങ്ങൾക്ക്‌ നൽകേണ്ട തുകപോലും ബജറ്റിൽ വകയിരുത്തുന്നില്ല. നികുതിവരുമാനം മുഴുവനും ലഭിക്കുന്ന കേന്ദ്രം, സംസ്ഥാനങ്ങൾക്ക്‌ നൽകേണ്ട വിഹിതം ഓരോ വർഷവും കുറയ്‌ക്കുകയാണ്‌. 2004 മുതൽ 2015 വരെ 19 ശതമാനമാണ്‌ നികുതി വർധനയെങ്കിൽ, 2016 മുതൽ 22 വരെ വർധന 7.8 ശതമാനം മാത്രമാണ്. കോവിഡ്‌ മഹാമാരിയിൽ സാമ്പത്തിക പ്രതിസന്ധി അനുഭവിച്ച ഘട്ടത്തിൽപോലും ധനസഹായം അനുവദിച്ചിട്ടില്ല. കേരളം ഇതിൽനിന്നെല്ലാം വ്യത്യസ്‌തമാണ്‌. കഴിഞ്ഞ വർഷംമാത്രം 18 ശതമാനമാണ്‌ അധികമായി ചെലവഴിച്ചത്‌. കോവിഡ്‌ ചികിത്സ, ഭക്ഷ്യക്കിറ്റ്, സാമൂഹ്യനീതി പെൻഷൻ എന്നിവയ്‌ക്കും ജനങ്ങളുടെ പ്രാഥമിക ആവശ്യങ്ങൾക്കും വലിയ തുക ചെവഴിച്ചിട്ടുണ്ട്‌. അതിനാലാണ്‌ കേരളം രാജ്യത്തിന്‌ മാതൃകയാകുന്നതെന്നും മന്ത്രി പറഞ്ഞു. സംസ്ഥാനങ്ങളുടെ അധികാരങ്ങൾ ഓരോന്നായി ബിജെപി സർക്കാർ കവർന്നെടുക്കുകയാണെന്ന്‌ മുൻമന്ത്രി വി എസ്‌ സുനിൽകുമാർ പറഞ്ഞു. സംസ്ഥാനങ്ങൾക്കുകൂടി അധികാരമുള്ള വിഷയങ്ങളിലെല്ലാം കേന്ദ്രം ഏകപക്ഷീയമായി നയരൂപീകരണം നടത്തുകയാണ്‌. ഏകാധിപത്യ പ്രവണതയിലേക്കാണ്‌ രാജ്യം നീങ്ങുന്നതെന്നും അദ്ദേഹം പറഞ്ഞു. എം പ്രകാശൻ അധ്യക്ഷനായി. വി നാരായണൻ സ്വാഗതവും എം ഷാജർ നന്ദിയും പറഞ്ഞു.