അരങ്ങില്‍ ആസ്വാദകര്‍ക്ക് വേറിട്ട അനുഭവമായി ‘സഫ്ദര്‍ നീ തെരുവിന്റെ തീക്കനല്‍’

കണ്ണൂര്‍: സിപിഐ എം പാര്‍ടി കോണ്‍ഗ്രസിന്റെ ഭാഗമായി കണ്ണൂര്‍ ടൗണ്‍ സ്‌ക്വയറില്‍ അരങ്ങേറിയ 'സഫ്ദര്‍ നീ തെരുവിന്റെ തീക്കനല്‍' നാടകം ആസ്വാദര്‍ക്ക് വെറിട്ട അനുഭവമായി . പിലാത്തറ, പരിയാരം, നെരുവമ്പ്രം, ഏഴോം മേഖലയിലെ കലാകാരന്മാരുടെ കൂട്ടായ്മ 'നാടിന്റെ തീപ്പാട്ടുകാര്‍' എന്ന സംഘമാണ് നാടകം അവതരിപ്പിച്ചത്. ഇന്ത്യയുടെ രാഷ്ട്രീയ ഭൂപടത്തില്‍ ചുവന്ന അക്ഷരത്തില്‍ അടയാളപ്പെടുത്തിയ രക്തസാക്ഷിത്വമായ സഫ്ദര്‍ ഹാഷ്മിയെയും അദ്ദേഹത്തിന്റെ നാടകങ്ങളെയും സമഗ്രമായി അവതരിപ്പിക്കുന്ന നാടകമാണിത്. സഫ്ദറിന്റ ജീവിതവും ഉത്തരേന്ത്യയിലെയും കേരളത്തിലെ ജീവിത സാഹചര്യങ്ങളും നാടകത്തിലുണ്ട്. ഒരു സമയം രണ്ടു പ്രദേശങ്ങള്‍ക്കിടയില്‍ സമാനതയോടെ വികസിക്കുന്ന പ്രമേയ ഘടനയാണ് നാടകത്തില്‍ അവലംബിക്കുന്നത്. തെരുവിന് വേണ്ടി ജീവിക്കുകയും രക്തസാക്ഷിത്വം വരിക്കുകയും ചെയ്ത സഫ്ദര്‍ ഹാഷ്മി എന്ന മനുഷ്യനോടുള്ള ആദരവും സമര്‍പ്പണവുമാണ് നാടകം അരങ്ങിലേക്കെത്തിക്കാന്‍ നാടിന്റെ തീപ്പാട്ടുകാര്‍ സംഘടനയ്ക്ക് പ്രചോദനമായത്. സുരേഷ് ബാബു ശ്രീസ്ഥ രചിച്ച നാടകം സംവിധാനം ചെയ്തത് ഡോ. സാംകുട്ടി പട്ടാംകരിയാണ്. ഗാനരചന കരിവെള്ളൂര്‍ മുരളി, ഡോ. സാംകുട്ടി പട്ടാംകരി.