വിവാഹം കഴിഞ്ഞുള്ള ആദ്യപിറന്നാള്‍; ആഘോഷത്തിനുള്ള തയ്യാറെടുപ്പ്, അപകടത്തില്‍ യുവതിക്ക് ദാരുണാന്ത്യം

കൊണ്ടോട്ടി: ബൈപ്പാസ് റോഡില്‍ സ്വകാര്യ ബസും ലോറിയും കൂട്ടിയിടിച്ച് ബസ് യാത്രക്കാരിയായ യുവതി മരിച്ചു. ഇരുപതോളം പേര്‍ക്ക് പരിക്കേറ്റു. കോഴിക്കോട് മെഡിക്കല്‍ കോളേജില്‍ നഴ്‌സിങ്ങ് ഓഫീസറായ സി. വിജി (26) ആണ് മരിച്ചത്. വെല്‍ഫെയര്‍പ്പാര്‍ട്ടി സംസ്ഥാന സെക്രട്ടറി കൃഷ്ണന്‍ കുനിയിലിന്റെ മകളാണ്. ബൈപ്പാസ് റോഡില്‍ പെടോള്‍പ്പമ്പിന് സമീപം ബുധനാഴ്ച രാവിലെ ആറുമണിയോടെയാണ് അപകടം. മഞ്ചേരിയില്‍നിന്ന് കോഴിക്കോട്ടേക്ക് പോയ ബസില്‍ മലപ്പുറം ഭാഗത്തേക്കുവന്ന ലോറി ഇടിക്കുകയായിരുന്നു. ഗുരുതരമായി പരിക്കേറ്റ വിജിയെ ഉടനെ കൊണ്ടോട്ടിയിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. മൊറയൂരില്‍നിന്നാണ് വിജി ബസില്‍ കയറിയത്. ജോലിക്ക് പോകുന്നതിനിടെയാണ് അപകടം. ഒഴുകൂര്‍ പോസ്റ്റുമാന്‍ നരവത്ത് സുജീഷാണ് വിജിയുടെ ഭര്‍ത്താവ്. അമ്മ: കുനിയില്‍ അങ്കണവാടി ഹെല്‍പ്പര്‍ ദേവകി. സഹോദരിമാര്‍: ഷിജിരിയ (അരീക്കോട്), ലിജി (പൂക്കോട്ടൂര്‍). വിജിയുടെ വിയോഗം പിറന്നാള്‍ദിനത്തില്‍ കൊണ്ടോട്ടിയില്‍ ലോറിയും ബസും കൂട്ടിയിടിച്ചുണ്ടായ അപകടത്തില്‍ പൊലിഞ്ഞ ആരോഗ്യപ്രവര്‍ത്തക വിജി യാത്രയായത് പിറന്നാള്‍ദിനത്തില്‍. കോഴിക്കോട് മെഡിക്കല്‍ കോളേജ് ആശുപത്രിയിലെ നഴ്‌സിങ് ഓഫീസര്‍ സി. വിജിയുടെ പിറന്നാളായിരുന്നു ബുധനാഴ്ച. ഇവര്‍ ജോലിക്കായി അതിരാവിലെ വീട്ടില്‍നിന്ന് പുറപ്പെട്ടതായിരുന്നു. ഭര്‍ത്താവ് സുജീഷാണ് ഇവരെ ഒഴുകൂരില്‍നിന്ന് മൊറയൂരില്‍ എത്തിച്ച് കോഴിക്കോട്ടേക്കുള്ള ബസില്‍ കയറ്റിവിട്ടത്. നാലുമാസം മുന്‍പാണ് ഇവരുടെ വിവാഹം കഴിഞ്ഞത്. വിവാഹത്തിനുശേഷമെത്തിയ പിറന്നാള്‍, ജോലികഴിഞ്ഞു വന്നതിനുശേഷം ആഘോഷിക്കാമെന്ന ധാരണയിലായിരുന്നു. എന്നാല്‍ ദുര്‍വിധി അതിനനുവദിച്ചില്ല. വിജി ഉള്‍പ്പെടെയുള്ളവരെ സാഹസികമായാണ് രക്ഷാപ്രവര്‍ത്തകര്‍ ബസിനുള്ളില്‍നിന്ന് പുറത്തെടുത്തത്. കൊണ്ടോട്ടി പോലീസ് രക്ഷാപ്രവര്‍ത്തനത്തിനു നേതൃത്വംനല്‍കി. കൊണ്ടോട്ടിയിലെ സ്വകാര്യ ആശുപത്രിയില്‍നിന്ന് മൃതദേഹം കോഴിക്കോട് മെഡിക്കല്‍ കോളേജ് ആശുപത്രിയിലെത്തിച്ച് പോസ്റ്റ്‌മോര്‍ട്ടം നടത്തിയ ശേഷം ബന്ധുക്കള്‍ക്ക് വിട്ടുകൊടുത്തു. കോഴിക്കോട് മെഡിക്കല്‍ കോളേജിലും തൃക്കളയൂരിലെ സ്വന്തം വീട്ടിലും പൊതുദര്‍ശനത്തിനു വെച്ചശേഷം ഭര്‍ത്തൃവീടായ ഒഴുകൂരിലെ നെരവത്ത് വീട്ടുവളപ്പില്‍ സംസ്‌കാരം നടന്നു.