മദ്യപിച്ച് ബഹളംവെച്ചു; തൃശൂരില്‍ യുവാവ് അമ്മയുടെ സഹായത്തോടെ സഹോദരനെ കൊലപ്പെടുത്തി

തൃശൂര്‍: ചേര്‍പ്പില്‍ സഹോദരനെ കൊലപ്പെടുത്തിയ കേസില്‍ അമ്മയും പ്രതി. അമ്മയുടെ സഹായത്തോടെയാണ് സഹോദരന്റെ മൃതദേഹം മറവു ചെയ്തതെന്ന് പ്രതിയായ കെ. ജെ. സാബു പോലീസിന് മൊഴിനല്‍കി. ചേര്‍പ്പ് മുത്തുള്ളിസ്വദേശിയായ കെ.ജെ ബാബുവാണ് കൊല്ലപ്പെട്ടത്.കഴിഞ്ഞ ശനിയാഴ്ച്ച അര്‍ധരാത്രിയാണ് സംഭവം. മദ്യപിച്ചെത്തി ബഹളമുണ്ടാക്കിയ ബാബുവിനെ സാബു കഴുത്തു ഞെരിച്ച് കൊലപ്പെടുത്തുകയായിരുന്നു. ആ സമയത്ത് അമ്മയും വീട്ടിലുണ്ടായിരുന്നു. അമ്മയുടെ സഹായത്തോടെ സാബു മൃതദേഹം വീടിനടുത്തുള്ള പാടശേഖരത്തില്‍ മറവുചെയ്തു. തുടര്‍ന്ന് ബാബുവിനെ കാണാനില്ലെന്ന് അമ്മയും സാബുവും ചേര്‍പ്പ് പോലീസ് സ്റ്റേഷനില്‍ പരാതി നല്‍കി.വ്യാഴാഴ്ച്ച രാവിലെയാണ് പ്രദേശവാസികള്‍ പാടശേഖരത്തില്‍ ബാബുവിന്റെ മൃതദേഹം കണ്ടത്. തുടര്‍ന്ന് പോലീസില്‍ അറിയിക്കുകയായിരുന്നു.