ജനകീയാസൂത്രണ പ്രവര്‍ത്തനങ്ങള്‍ ഇനിയും മെച്ചപ്പെടുത്തണം: തോമസ് ഐസക്

കല്യാശേരി :25 വര്‍ഷത്തെ അനുഭവങ്ങളില്‍ നിന്നും ജനകീയാസൂത്രണത്തെ കൂടുതല്‍ മെച്ചപ്പെടുത്താനുള്ള പ്രവര്‍ത്തനങ്ങളുണ്ടാകണമെന്ന് സിപിഐ എം കേന്ദ്ര കമ്മിറ്റിയംഗം ഡോ. ടി എം തോമസ് ഐസക് . ജനകീയാസൂത്രണത്തിന്റെ പ്രാരംഭ പ്രവര്‍ത്തനങ്ങള്‍ നടന്ന കാലത്തില്‍നിന്നും നമ്മള്‍ ഏറെ മുന്നോട്ടുപോയി. പുതിയ കാലം ആവശ്യപ്പെടുന്ന ജനകീയ ഇടപെടലുകളാണ് തദ്ദേശഭരണ സംവിധാനത്തില്‍ ഉണ്ടാകേണ്ടതെന്നും അദ്ദേഹം പറഞ്ഞു. സിപിഐ എം 23ാം പാര്‍ടി കോണ്‍ഗ്രസിന്റെ ഭാഗമായി കല്യാശേരിയില്‍ സംഘടിപ്പിച്ച 'ജനകീയാസൂത്രണത്തിന്റെ 25 വര്‍ഷങ്ങള്‍' സെമിനാര്‍ ഉദ്ഘാടനം ചെയ്യുകയായിരുന്നു ഐസക്. ജനകീയാസൂത്രണം നടപ്പാക്കാന്‍ കല്യാശേരി തെരഞ്ഞെടുത്തതിന് പല ഘടകങ്ങളുണ്ട്. കല്യാശേരിയുടെ ചരിത്ര സാമൂഹ്യ പശ്ചാത്തലം, ജനപ്രതിനിധികളുടെയും വിഷയ വിദഗ്ധരുടെയും പ്രദേശിക ജനതയുടെയും അകമഴിഞ്ഞ സഹകരണം എന്നിവ അതില്‍ പ്രധാനമാണ്. കല്യാശേരി ഒരു മാതൃകയായി അവതരിച്ചപ്പോഴും മറ്റ് സ്ഥലങ്ങളില്‍ ഇത് അരാജക സ്വഭാവത്തിലേക്ക് പോകുമോ എന്ന് സംശയിച്ചവരുണ്ട്. പക്ഷേ, എങ്ങനെ നടപ്പാക്കണമെന്ന് വ്യക്തമായ രൂപമാണ് കല്യാശേരി നല്‍കിയത്. താഴെത്തട്ടില്‍നിന്ന് അധികാരത്തില്‍ ഇടപെടാനുള്ള പൗരന്റെ ഇടം വികസിപ്പിച്ചു. പൗരബോധമുള്ള ജനം ഇടപെടുന്ന സ്ഥലങ്ങളില്‍ കാര്യങ്ങള്‍ നന്നാവും. അത് നമ്മുടെ രാഷ്ട്രീയ ബോധ്യത്തെ അടിസ്ഥാനപ്പെടുത്തിയാവും. ഒരു പ്രദേശത്തിന്, അവിടത്തെ ജനതയ്ക്ക് ആവശ്യമായ എന്ത് പദ്ധതിയും തുടങ്ങാം.നാടിന്റെ സുസ്ഥിരമായ വികസനത്തിന്റെ ആസൂത്രണം മുതല്‍ പദ്ധതി നടപ്പാവുന്നത് വരെയുള്ള ഘട്ടങ്ങളില്‍ ജനങ്ങളുടെ സജീവ ഇടപെടല്‍ വേണം. അന്ന് കല്യാശേരിയില്‍ തുടങ്ങി വച്ച അധികാര വികേന്ദ്രീകരണമാതൃക ഇന്ന് എവിടെയെത്തി നില്‍ക്കുന്നുവെന്നതും വിശദ പഠനത്തിന് വിധേയ മാക്കുന്നുണ്ട്. ഇതിന്റെ അടിസ്ഥാനത്തില്‍ പുതിയ ദൗത്യങ്ങള്‍ ഏറ്റെടുക്കാന്‍ തദ്ദേശ ഭരണ സംവിധാനങ്ങള്‍ മുന്നോട്ടു വരണമെന്നും തോമസ് ഐസക് പറഞ്ഞു. ജില്ലാ പഞ്ചായത്ത് പ്രസിഡന്റ് പി പി ദിവ്യ അധ്യക്ഷയായി. എന്‍സിപി സംസ്ഥാന പ്രസിഡന്റ് പി സി ചാക്കോ, പ്രൊഫ. എ ജി ഒലീന എന്നിവര്‍ സംസാരിച്ചു. ടി ചന്ദ്രന്‍ സ്വാഗതം പറഞ്ഞു