കുഞ്ഞുങ്ങളെ ഉപേക്ഷിച്ചു നാടുവിട്ട കമിതാക്കള്‍ പൊലീസ് പിടിയില്‍

മലപ്പുറം : കുഞ്ഞുങ്ങളെ ഉപേക്ഷിച്ചു നാടുവിട്ട കമിതാക്കള്‍ പൊലീസ് പിടിയില്‍. ജുവനൈല്‍ ജസ്റ്റിസ് നിയമപ്രകാരം കേസെടുത്തതോടെ 27 വയസ്സുകാരിയെയും 30 വയസ്സുകാരനെയും റിമാന്‍ഡ് ചെയ്തു. വിവാഹിതരും 2 വീതം കുട്ടികളുടെ രക്ഷിതാക്കളുമായ ഇവര്‍ മഞ്ചേരിക്ക് സമീപത്തെ ഫ്‌ലാറ്റില്‍ താമസിക്കുമ്പോഴാണ് അടുപ്പത്തിലാകുന്നത്. 6മാസം മുന്‍പ് നാട് വിടുകയായിരുന്നു. യുവതിയുടെ പിതാവ് നല്‍കിയ പരാതിയില്‍ പോലീസ് നടത്തിയ അന്വേഷണത്തിലാണ് ഇരുവരും പിടിയിലായത്. ചെന്നൈയില്‍നിന്ന് 50 കിലോമീറ്റര്‍ അകലെ ആവടി ജില്ലയില്‍ ഒളിവില്‍ കഴിഞ്ഞിരുന്ന ഇവരെ ഗ്രാമീണരുടെ സഹായത്തോടെ അഞ്ഞൂറോളം വീടുകള്‍ പരിശോധിച്ചാണ് പിടികൂടിയത്. ഇതിനിടെ, പൊലീസ് പിന്തുടരുന്നതറിഞ്ഞു മൊബൈല്‍ ഫോണ്‍ സ്വിച്ച് ഓഫ് ആക്കുകയും വിവിധ സ്ഥലങ്ങളിലെ ഷോപ്പിങ് മാള്‍, ഫുഡ് കോര്‍ട്ട് എന്നിവിടങ്ങളില്‍ നിന്നുള്ള ഫോട്ടോ, വിഡിയോ എന്നിവ പോസ്റ്റ് ചെയ്ത് അന്വേഷണം വഴി തെറ്റിക്കുകയും ചെയ്തു. ഇന്‍സ്‌പെക്ടര്‍ സി. അലവിയുടെ നേതൃത്വത്തില്‍ എസ് ഐ ബഷീര്‍,എസ്ഐ കൃഷ്ണദാസ് സംഘാംഗങ്ങളായ അംഗങ്ങളായ അനീഷ് ചാക്കോ, ഐ.കെ.ദിനേഷ്, പി.മുഹമ്മദ് സലീം എന്നിവരാണ് അന്വേഷിച്ചത്.