വൈവിധ്യങ്ങളുടെ ഇന്ത്യയായി ഊട്ടുപുര

കണ്ണൂര്‍: ഇന്ത്യന്‍ രുചിവൈവിധ്യത്തിന്റെ സംഗമമായി പാര്‍ട്ടി കോണ്‍ഗ്രസ് ഭക്ഷണപ്പുര മാറുകയാണ്. രാജ്യത്തിന്റെ വിവിധ ഭാഗത്തുള്ളവര്‍ സമ്മേളിക്കുന്ന പാര്‍ട്ടി കോണ്‍ഗ്രസിന്റെ ഭക്ഷണഹാളിലും രുചിയുടെ മേളം. ഹൈദരാബാദി മുര്‍ഗും തര്‍ക്കാരി ബിരിയാണിയും സാബുന്‍ അരി പൈനാപ്പിള്‍ പായസവും സദ്യവട്ടവും കേരളീയരുടെ കഞ്ഞിമുതല്‍ ഇന്ത്യന്‍ വിഭവങ്ങള്‍ എല്ലാമുണ്ട് ഭക്ഷണശാലയില്‍. വെളിച്ചെണ്ണ ഭക്ഷണത്തില്‍ ഉപയോഗിക്കുന്നത് ഉത്തരേന്ത്യക്കാര്‍ക്ക് ഇഷ്ടമല്ല. അവര്‍ക്കായി അവരുടെ രുചിക്കനുസരിച്ചുള്ള വിഭവമാണ് ഒരുക്കിയിട്ടുള്ളത്. രാവിലെ ഏഴുമുതലാണ് പ്രഭാത ഭക്ഷണം. പുഴുങ്ങിയ പഴവും മുട്ടയും, കേസരി, ഓട്സ്, പൂരി, ചപ്പാത്തി, റൊട്ടി, ദാല്‍ എന്നിവയെല്ലാം മെനുവിലുണ്ട്. ഒരു മണിക്ക് ഉച്ചഭക്ഷണം. കൂട്ടുകറിയും അവിയലും പുളിങ്കറിയും സാമ്പാറും പരിപ്പുകറിയുമുള്ള ചോറ്. ചിക്കന്‍, ചെമ്മീന്‍, മീന്‍ വിഭവങ്ങള്‍ ഒപ്പമുണ്ട് . ചോറിനൊപ്പം ചപ്പാത്തി, പൊറോട്ട എന്നിവയുമുണ്ട്. രാത്രി പനീര്‍ ബട്ടര്‍ മസാല, ബട്ടര്‍ ബസാല, ചിക്കന്‍ കറികളും കുറുമ എന്നിങ്ങനെ വൈവിധ്യങ്ങളുണ്ട്. കോഴിക്കോടിന്റെ രുചി പെരുമയില്‍ മുന്നില്‍ നില്‍ക്കുന്ന പാരഗണ്‍ ഹോട്ടല്‍ ഉടമ സുമേഷ് ഗോവിന്ദാണ് ഭക്ഷണമൊരുക്കാന്‍ ചുക്കാന്‍ പിടിക്കുന്നത്.