സെമിനാര്‍ വേദിയില്‍ കെ. സുധാകരനെതിരെ ആഞ്ഞടിച്ച് എം.വി. ജയരാജന്‍

കണ്ണൂരില്‍ നടക്കുന്ന സി.പി.ഐ.എം പാര്‍ട്ടി കോണ്‍ഗ്രസ് സെമിനാര്‍ വേദിയില്‍ കെ.പി.സി.സി അദ്ധ്യക്ഷന്‍ കെ. സുധാകരനെതിരെ രൂക്ഷ വിമര്‍ശനവുമായി സി.പി.ഐ.എം നേതാവ് എം.വി. ജയരാജന്‍. കോണ്‍ഗ്രസിന്റെ സംസ്ഥാന അദ്ധ്യക്ഷ പദവിയില്‍ കോണ്‍ഗ്രസുകാര്‍ പോലും വെറുക്കുന്ന കെ. സുധാകരന്‍ എത്തിയതിന്റെ ഫലമായാണ് കോണ്‍ഗ്രസ് നേതാക്കളെ സി.പി.ഐ.എം സെമിനാറില്‍ പങ്കെടുക്കുന്നതില്‍ നിന്ന് വിലക്കുന്ന അവസ്ഥയുണ്ടായത്. ഇത് ഊരുവിലക്കിന് സമാനമാണെന്നും എം.വി. ജയരാജന്‍ പറഞ്ഞു. വിവാദങ്ങള്‍ക്കൊടുവിലാണ് മുതിര്‍ന്ന കോണ്‍ഗ്രസ് നേതാവ് കെ.വി തോമസ് കണ്ണൂരില്‍ നടക്കുന്ന സി.പി.ഐ.എം പാര്‍ട്ടി കോണ്‍ഗ്രസ് സെമിനാര്‍ വേദിയിലെത്തിയത്. ഹൈക്കമാന്‍ഡ് രണ്ട് തവണ സെമിനാറില്‍ പങ്കെടുക്കരുതെന്ന് ആവശ്യപ്പെട്ടിട്ടും കെ.വി. തോമസ് അത് നിരസിക്കുകയായിരുന്നു. മുഖ്യമന്ത്രി പിണറായി വിജയന്‍, സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ എന്നിവര്‍ വേദിയിലുണ്ട്. എഐസിസി അംഗം കെ.വി. തോമസിനെ കോടിയേരി ബാലകൃഷ്ണന്‍ സി.പി.എമ്മിലേക്ക് ക്ഷണിച്ചിരുന്നു. സഹകരിക്കാന്‍ തയ്യാറായാല്‍ കെ.വി. തോമസിനെ സ്വീകരിക്കും. സെമിനാറില്‍ പങ്കെടുക്കാനുള്ള തീരുമാനത്തെ സ്വാഗതം ചെയ്യുകയാണെന്നും ഇതിന്റെ പേരില്‍ കെ.വി. തോമസ് വഴിയാധാരമാകില്ലെന്നും കോടിയേരി വ്യക്തമാക്കിയിരുന്നു. കെവി തോമസിനെ പുറത്താക്കുന്നതില്‍ തീരുമാനം ഉടനുണ്ടാകുമെന്ന് കെപിസിസി പ്രസിഡന്റ് കെ സുധാകരന്‍ പ്രതികരിച്ചിരുന്നു.