അധ്യാപികയായ അമൃത മയക്കുമരുന്ന് വില്‍പ്പന നടത്തിയത് വിദ്യാര്‍ത്ഥികള്‍ക്കും ടെക്കികള്‍ക്കും ; ഒടുവില്‍ കസ്റ്റഡിയിലെടുത്ത് പൊലീസ്

കൊച്ചി :ഇന്‍ഫോപാര്‍ക്കിന് സമീപത്ത് വിദ്യാര്‍ത്ഥികള്‍ക്കും ജോലിക്കാര്‍ക്കും എംഡിഎംഎ വില്‍പ്പന നടത്തിയ അധ്യാപികയടക്കം മൂന്ന് പേര്‍ അറസ്റ്റില്‍. കായിക അധ്യാപിക അടങ്ങുന്ന സംഘമാണ് ലഹരിമരുന്ന് വില്‍പ്പന നടത്തിയിരുന്നത്. മലപ്പുറം പെരിന്തല്‍മണ്ണ സ്വദേശി കപില്‍ സനില്‍, തിരുവല്ല സ്വദേശി കുളങ്ങര അഭിമന്യു സുരേഷ്, തിരുവനന്തപുരം വള്ളക്കടവ് അമൃത എന്നിവരാണ് പിടിയിലായത്. ലഹരി വില്‍പ്പന സംബന്ധിച്ച് രഹസ്യ വിവരം ലഭിച്ചതിനെ തുടര്‍ന്ന് ദിവസങ്ങളായി ഇവര്‍ പൊലീസ് നിരീക്ഷണത്തിലായിരുന്നു. പല തവണ പിടികൊടുക്കാതെ രക്ഷപ്പെട്ട സംഘത്തെ എറണാകുളം ഡാന്‍സാഫും ഇന്‍ഫോപാര്‍ക്ക് പൊലീസും ചേര്‍ന്നാണ് പിടികൂടിയത്. ബംഗളൂരുവില്‍ നിന്നാണ് ഇവര്‍ ലഹരി എത്തിക്കുന്നതെന്നും അടുപ്പക്കാര്‍ക്ക് മാത്രമാണ് വിറ്റിരുന്നതെന്നും പൊലീസ് കണ്ടെത്തി. ഫോണുകളും സിം കാര്‍ഡുകളും മാറി മാറി ഉപയോഗിച്ചിരുന്നതിനാല്‍ പ്രതികളെ പിടികൂടുക പ്രയാസമായിരുന്നെന്നും പൊലീസ് പറഞ്ഞു.