പാലക്കാട്ടെ 2 പൊലീസുകാരുടെ മരണം; ഇന്ന് തെളിവെടുപ്പ്, പ്രതികളുടെ അറസ്റ്റ് രേഖപ്പെടുത്തിയേക്കും

പാലക്കാട് മുട്ടിക്കുളങ്ങരയിലെ പൊലീസ് ഉദ്യോഗസ്ഥരുടെ ദുരൂഹ മരണത്തില്‍ ഇന്നലെ കസ്റ്റഡിയില്‍ എടുത്തവരുടെ അറസ്റ്റ് ഇന്ന് രേഖപ്പെടുത്തിയേക്കും . കാട്ടുപന്നിയെ പിടികൂടാന്‍ വച്ച കെണിയില്‍ നിന്നാണ് ഇരുവര്‍ക്കും ഷോക്കേറ്റതെന്ന് പൊലീസ് വ്യക്തമാക്കി. പൊലീസുകാരുടെ മൃതദേഹങ്ങള്‍ കണ്ടെത്തിയ സ്ഥലത്തിന്റെ ഉടമയും സുഹൃത്തുമാണ് കസ്റ്റഡിയിലുള്ളത്. പ്രതികളുമായി ഇന്ന് തെളിവെടുപ്പ് നടത്തും. തെരച്ചില്‍ തുടരുന്നതിനിടെ ഇന്നലെയാണ് വയലില്‍ മരിച്ച നിലയില്‍ കണ്ടെത്തിയത്. ഷോക്കേറ്റാണ് മരണമെന്ന് സംശയമുയര്‍ന്നിരുന്നു. പൊള്ളലേറ്റ നിലയിലായിരുന്നു മൃതദേഹങ്ങള്‍. സ്ഥലത്ത് എസ്പിയുടെ നേതൃത്വത്തില്‍ പരിശോധന നടത്തിയിരുന്നു. തോട്ടില്‍ നിന്നും അന്‍പത് മീറ്ററോളം മാറി നെല്‍പാടത്താണ് മൃതദേഹങ്ങള്‍ കിടന്നിരുന്നത്. രണ്ടു മൃതദേഹവും രണ്ടിടത്തായാണ് കിടന്നത്.എന്നാല്‍ പാടത്ത് വൈദ്യുതി വേലിയൊന്നും കണ്ടെത്താനായിട്ടില്ല. തോടിന് സമീപം ഒരു മോട്ടോര്‍പുരയുണ്ട്. കാട്ടുപന്നിക്കായി വച്ച കെണിയില്‍ ഇവര്‍ അകപ്പെടുകയായിരുന്നോ എന്ന കാര്യവും പൊലീസ് അന്വേഷിക്കുന്നുണ്ട്. ഇതിനെ തുടര്‍ന്നാണ് സ്ഥലമുടമയേയും സുഹൃത്തിനേയും കസ്റ്റഡിയില്‍ എടുത്തത്. മറ്റെവിടെ നിന്നെങ്കിലും ഷോക്കേറ്റ് മരിച്ചതിന് ശേഷം മൃതദേഹം വയലില്‍ കൊണ്ടു വന്നിട്ടതാണോയെന്നും സംശയമുണ്ട്.