വോട്ടിന് യുഡിഎഫിന്റെ പണം വാഗ്ദാനം; പരാതിയുമായി എം.സ്വരാജ്

തൃക്കാക്കരയില്‍ യുഡിഎഫിനു വോട്ടുചെയ്യാന്‍ പണം വാഗ്ദാനം ചെയ്യുന്ന സ്ഥാനാര്‍ഥിയുടെ ചിത്രം സഹിതം പ്രചരിപ്പിച്ചതിനെതിരെ എല്‍ഡിഎഫ് തിരഞ്ഞെടുപ്പ് കമ്മറ്റി കണ്‍വീനര്‍ എം.സ്വരാജ് ചീഫ് ഇലക്ടറല്‍ ഓഫിസര്‍ക്ക് പരാതി നല്‍കി. പരാജയം ഉറപ്പായപ്പോള്‍ അവിശുദ്ധ മാര്‍ഗങ്ങള്‍ തേടാന്‍ യുഡിഎഫ് ദയനീയമായി നിര്‍ബന്ധിതരായെന്ന് സ്വരാജ് പറഞ്ഞു. കോണ്‍ഗസിന്റെ പ്രവാസി സംഘടനയായ ഇര്‍കാസ് യൂത്ത് വിങ്ങിന്റെ പേരിലാണ് പ്രചരണം. ഏറ്റവും വലിയ ലീഡ് യുഡിഎഫിന് നേടിക്കൊടുക്കുന്ന ബൂത്ത് കമ്മിറ്റിക്ക് 25,001 രൂപ സമ്മാനം നല്‍കുന്നു എന്നാണ് പരസ്യം. ബൂത്ത് കമ്മിറ്റി അംഗങ്ങള്‍ മണ്ഡലത്തിലെ വോട്ടര്‍മാര്‍ കൂടി ആയതിനാല്‍ ഈ പരസ്യം വോട്ടിന് പണം വാഗ്ദാനം ചെയ്യുന്നത് തന്നെയാണെന്ന് സ്വരാജ് പറഞ്ഞു. മുഖ്യ തിരഞ്ഞെടുപ്പ് നിരീക്ഷകന്‍, ജില്ലാ തിരഞ്ഞെടുപ്പ് ഓഫിസര്‍ കൂടിയായ ജില്ലാ കലക്ടര്‍, റിട്ടേണിങ് ഓഫിസര്‍ എന്നിവര്‍ക്കും സ്വരാജ് പരാതി നല്‍കി. അതേസമയം, തൃക്കാക്കര ഉപതിരഞ്ഞെടുപ്പിലെ യുഡിഎഫ് സ്ഥാനാര്‍ഥി ഉമ തോമസിന്റെ നാമനിര്‍ദേശ പത്രിക തള്ളണമെന്ന ആവശ്യവുമായി ഹൈക്കോടതിയില്‍ ഹര്‍ജി. സ്വതന്ത്ര സ്ഥാനാര്‍ഥി സി.പി.ദിലീപ് നായരാണ് കോടതിയെ സമീപിച്ചത്. ഭൂനികുതി കുടിശ്ശിക, പി.ടി.തോമസിന്റെ ബാങ്ക് വായ്പ കുടിശ്ശിക തുടങ്ങിയവയുമായി ബന്ധപ്പെട്ട കാരണങ്ങള്‍ ചൂണ്ടിക്കാട്ടിയാണ് ഹര്‍ജി. നാമനിര്‍ദേശ പത്രികയിലെ പിഴവുകള്‍ ചൂണ്ടിക്കാണിച്ചു നല്‍കിയ പരാതി റിട്ടേണിങ് ഓഫിസര്‍ കൃത്യമായി പരിഗണിച്ചില്ലെന്നു പരാതിയില്‍ പറയുന്നു. ഹര്‍ജി ഹൈക്കോടതി തിങ്കളാഴ്ച പരിഗണിക്കും.